Sipas një studimi të ri, një opsion trajtimi për dispepsi (dhimbje stomaku) mund të jetë shafrani i indisë.
Studimi, i botuar të hënën në revistën mjekësore BMJ, krahasoi se si më shumë se 150 njerëz me dispepsi, iu përgjigjën pozitivisht trajtimit me ilaçin Omeprazol dhe shafranin e indisë.
Omeprazoli është një ilaç i zakonshëm që përdoret për të trajtuar disa probleme të zemrës dhe ezofagut duke reduktuar acidin në stomak, sipas klinikës Mayo.
“Përveç qëllimeve anti-inflamatore dhe antioksiduese, shafrani i Indisë mund të jetë një opsion për trajtimin e dispepsisë me efikasitet të krahasueshëm me omeprazolin”, tha autori kryesor i studimit Dr. Krit Pongpirul, profesor në Universitetin Chulalongkorn në Bangkok, Tajlandë.
Shafrani i Indisë është përdorur nga njerëzit në Azinë Juglindore për të trajtuar problemet në stomak dhe probleme të tjera inflamatore. Përdorimi i tij mjekësor daton qindra vjet më parë, sipas Bibliotekës Kombëtare të Mjekësisë.
Në Shtetet e Bashkuara, përdorimi i tij kryesor ka qenë si një shtesë diete anti-inflamatore dhe antioksiduese për të lehtësuar osteoartritin dhe sindromën e zorrës së irrituar, shtoi ai.
Por kjo është prova e parë klinike që krahason drejtpërdrejt shafranin e Indisë me omeprazolin në trajtimin e dispepsisë.
Përbërja e shafranit është studiuar për një sërë të mirash që sjell, duke përfshirë edhe problemet me zorrët dhe artritin.
A duhet të shtoni shafranin e Indisë në dietën tuaj për tretje më të mirë? Flisni fillimisht me mjekun tuaj, thonë studiuesit.
“Është e rëndësishme të siguroheni që shafrani i Indisë të mos ndërveprojë keq me ndonjë nga medikamentet e tjera që merrni”.
Por, shafrani i Indisë konsiderohet në përgjithësi i sigurt nëse konsumohet në sasi që zakonisht gjendet në ushqime.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.