.png)
Vërtet pa fat Luiza Gega, atletja shqiptare që nuk ka mundur të marrë medalje vetëm për 32 të qindtat në Berlin. Ajo ka zënë vendin e katërt në Kampionatin Eruopian të Atletikës, që po zhvillohet në Gjermani. Atletja shqiptare regjistroi kohën 9 minuta, 24 sekonda e 78 të qindtat në disiplinën e 3000 metrave me pengesa, ndërsa atletja e vendit të tretë kapi kohën 9 minuta, 24 sekonda e 46 të qindtat, 32 të qindtat më mirë se sportistja jonë.
Gega ishte shumë afër podit, madje e ka “prekur” atë, por atletja norvegjeze, më e gjatë se atletja jonë, i ka rrëmbyer medaljen e bronzit. Është vërtet për të ardhur keq që mundi dhe skarifica e Gegës nuk është shpërblyer në këtë kompeticion të rëndësishëm. Megjithatë, Luiza ka vërtetuar se është një atlete e nivelit të lartë, pavarësisht se në Shqipëri nuk ka infrastrukturën e nevojshme për stërvitje, siç e kanë koleget e saj të vendeve të tjera. Vendi i katërt është një rezultat i mirë, duke ditur se në finale garonin 15 sportiste, por Luiza synonte të mos dilte pa medalje. Garën e 3000 metrave e fitoi gjermanja Gesa-Felicitas Krauese, me kohën 9.19.80, e dyta doli zvicerania Fabienne Schlumpf, me kohën 9.22.29, ndërsa e treta norvegjezja Karoline Bjerkeli Grovdal, me kohën 9.24.46.
Shqipëria del pa medalje nga ky kompeticion, pasi edhe atleti i kërcimit së gjati, Izmir Smajlaj, nuk ia doli të ngjitej në pod.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
