Kryetari i Kuvendit, Gramoz Ruçi, i ka dërguar letër presidentit Ilir Meta, ku i kërkon që të propozojë një emër kandidati për kreun e Kontrollit të Lartë të Shtetit.
Ruçi shkruan se Meta duhet të respektojë afatet për depozitimin e kandidaturës..
Dy vjet pas përfundimit të afatit të mandatit të Bujar Leskajt, Kuvendi nuk ka miratuar asnjë prej tre emrave kandidatë që Ilir Meta ka depozituar në Kuvend duke filluar me emrin e Vitore Tushës.
“Presidenti i Republikës Sh.T.Z Ilir Meta ka marrë një letër pak ditë më parë nga Kryetari i Kuvendit, z.Gramoz Ruçi për çështjen e KLSH.
Presidenti Meta e ka respektuar me përgjegjshmëri maksimale detyrimin kushtetues duke propozuar tre kandidatura mjaft dinjitoze dhe të kualifikuara për të garantuar pavarësinë e KLSH.
Presidenti Meta si gjithmonë do të përmbushë detyrimet e Tij kushtetuese për të garantuar pavarësinë e institucioneve...” thuhet në reagimin e zëdhënësit të Presidentit, Tedi Blushi.
Meta ka sqaruar me kohë se mandati i ushtrimit të mandatit si Kryetar i Kontrollit të Lartë të Shtetit pas përfundimit të afatit 7-vjeçar të tij, është e zgjidhur nga vetë ligji për KLSH. Në bazë të ligjit, ky i fundit qëndron në detyrë deri në zgjedhjen e Kryetarit të ri.
Deri më tash, Meta nuk ka pranuar as kërkesën e vetë Bujar Leskajt për t’ia deleguar mandatin zv-kryetares.
Sipas kreut të shtetit, “nëse organi i Kontrollit të Lartë të Shtetit do të përfaqësohej nga një funksionar tjetër dhe jo nga Kryetari i tij, kjo do ta zhvishte atë nga mbrojtja kushtetuese dhe ligjore që ka ky institucion dhe në këtë mënyrë do të cenohej integriteti dhe pavarësia e tij”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.