Gazeta Si - Altin Lala, ish-kapiteni i Shqipërisë, ishte i përzgjedhuri i UEFA-s për shortin e sotëm të fazës së 1/8-të të Ligës së Konferencës. Një kompeticion që zhvillohet për herë të parë, finalja e të cilit është vendosur të luhet në Tiranë, më 25 maj.
Gjatë hedhjes së shortit Lala nuk e fshehu entuziazmin që për herë të parë në histori Shqipëria ka shansin të organizojë një event të tillë futbolli. Ai shpreson që në finalen e Tiranës të luajnë Roma e Marash Kumbullës, ose anglezët e Leiçesterit apo Olimpiku i Marsejës.
“Është eventi më i rrallë që do të organizojë Shqipëria dhe për këtë populli shqiptar është shumë i lumtur. Ëshë një event i mirë edhe për klubet, që kanë mundësinë të fitojnë një kompeticion europian. Ka ekipe të mëdha në këtë kompeticion, siç janë Roma, Leiçesteri, apo Olimpiku i Marsejës. Shpresoj që njëri prej tyre të vijë në Tiranë për finalen”, - theksoi Lala.
Më pare, gjatë shorteve të këtij edicioni, UEFA ka ftuar edhe ish-kapitenin tjetër kuqezi, Lorik Canën, duke i bërë jehonë faktit që finalja do të zhvillohet në Shqipëri.
Shorti ndërkohë ka dhuruar disa përballje interesante. Roma përballet me Viteshen, kurse PAOK-u i Enea Mihajt me belgët e Gent.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.