.png)
Gazeta Si - Ashensori i shkëputur një ditë më parë në QSUT, që shkaktoi plagosjen e dy personave, nuk ka qenë i regjistruar në ISHMT.
Inspektoriati Shtetëror i Mbikëqyrjes së Tregut, ka sqaruar se nuk kishte dijeni për ashensorin, pavarësisht se i ishte bërë një ekzaminim fillestar.
Mungesa e kontrolleve teknike në mënyrë periodike, duket se ka shkaktuar dhe incidentin, ku pësuan dëmtime një paciente 80 vjeçe dhe një punonjës shëndetësor.
Sipas ISHMT-së, thuhet se personi përgjegjës i produkt/instalimit, “ka për detyrë të kontraktojë një Organ të Miratuar, i cili bën kontrollin fillestar të ashensorit dhe atë periodik, për të vlerësuar nëse ashensori është në përputhje me rregullat teknike për të garantuar sigurinë e përdoruesve”.
Pas kryerjes së ekzaminimit fillestar, personi përgjegjës ka detyrimin për regjistrimin e ashensorit pranë ISHMT-së.
Por një gjë e tillë nuk ka ndodhur, duke pasur mungesë të kontrolleve të vazhdueshme siç e parashikon edhe ligji.
Ka qenë ora 23:30 (15 maj 2022) kur barrelisti së bashku me një paciente 80-vjeçare, kanë qenë në katin -1 të godinës së spitalit kur kanë hipur në ashensor për t'u ngjitur në katin e parë.
Në mes dy kateve, ashensori ka pësuar defekt dhe ka rënë në katin -1. Të dy, pacientja dhe infermieri janë lënduar.
Pas ngjarjes, policia tha se ka proceduar penalisht pronarin e kompanisë “Sulollari Klima”, Ardian Sulollari.
Në gjendje të lirë do të hetohet edhe tekniku përgjegjës për mirëmbajtjen e ashensorit, Ermal Braja.
Të dy ata akuzohen për veprën penale “Shkelja e rregullave të mbrojtjes në punë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
