Rezultatet e dy ndeshjeve të fundit kanë bërë që Shqipëria dhe Kosova të humbasin terren në renditjen e FIFA-s për muajin tetor. Një rënie më të madhe kanë pësuar kuqezinjtë e trajnerit Edi Reja, të cilët nuk arritën të fitonin asnjë nga dy ndeshjet e tetorit në Ligën e Kombeve ndaj Kazakistanit dhe Lituanisë, ku morën dy pikë.
Shqipëria ndodhet në vend të 69-të, duke humbur kështu 3 vende në krahasim me renditjen e shtatorit, ku mbante vendin e 66-të. Ajo është parakaluar edhe nga El Salvadori dhe Arabia Saudite. Një rënie e konsiderueshme për Kombëtaren, që mund ta rregullojë imazhin e saj me dy ndeshjet e fundit në grup të Ligës së Kombeve. Kuqezinjtë do të presin në “Air Albania Stadium“ Kazakistanin dhe Bjellorusinë, dy ndeshje që mund të sjellin vendin e parë, nëse fitohen.
Kosova ka humbur një vend në renditjen e FIFA-s. Dardanët mbajnë vendin e 117-të dhe kanë një rënie të lehtë pas humbjes me Slloveninë në Prishtinë dhe barazimit me Greqinë në Athinë. Kosova është kaluar nga Namibia.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.