Firma dhe zyrtarizmi nga FSHF-ja mungojnë ende, por trajneri Edi Reja e quan punë të kryer rinovimin me 4 vjet të kontratës në krye të Kombëtares së Shqipërisë. Ai ka folur së fundi për vazhdimin e bashkëpunimit me kuqezinjtë për “Radiosei” në Itali. Mes të tjerash, Reja thekson se është një sfidë e bukur për të, pasi do të jetë trajneri me moshën më të madhe në qarkullim.
"Është një sfidë shumë e bukur, një projekt serioz dhe i rëndësishëm, që më jep mjaft entuziazëm. Do të kem mbështetjen e të gjithë faktorëve futbollistikë dhe pastaj, nëse jam trajneri më i moshur në qarkullim, më jep një kënaqësi më vete”, - është shprehur trajneri Edi Reja, i cili nuk është aspak euforik në deklarata dhe nuk bën premtime për Botërorin e Katarit. Ai e di shumë mirë sa e vështirë është që Shqipëria të jetë mes 13 skuadrave europiane që shkojnë në këtë kompeticion.
Reja ka si objektiv Euro 2024, ku beson shumë se Shqipëria e tij mund t’ia dalë, duke shkuar për herë të dytë në historinë e saj. Më pas edhe një mendim për shqiptarët. "Shqipëria është një vend i gjallë, një vend vital. Njerëzit kanë një konsideratë të lartë për ne italianët. Ndoshta ata besojnë më shumë te ne nga sa ne besojmë te vetja jonë”, - ka theksuar trajneri italian. Edi Reja do të jetë 77 vjeç në 2022-shin, por ai nuk ka dëshirë t’i shohë aspak shifrat. Me shumë modesti ai kërkoi kontratë 2-vjeçare me kuqezinjtë, por presidenti Armand Duka këmbënguli për kontratë 4-vjeçare, duke lënë të kuptohet se objektivi është Europiani 2024.
Ditët në vazhdim pritet të kryen edhe formalitetet e kontratës së re të Rejës. Në 6 muajt që e drejtoi Shqipërinë, ai tregoi se mund ta udhëheqë këtë skuadër drejt një objektivi madhor.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.