Trajneri i Kombëtares, Edi Reja, ka pohuar pas humbjes me Poloninë se skuadra u ndëshkua në të vetmin moment që bëri disa gabime në humbjen e topit. Sipas tij, loja ishte gati e barabartë dhe Shqipëria meritonte një pikë.
“Të vjen keq, bëmë një ndeshje të mirë dhe të them të drejtën nuk e pritja këtë temperament të ekipit. Treguam se mund të luanim si të barabartë ndaj Polonisë. Patëm vetëm një rënie në pjesën e dytë dhe po bëja gati ndërrimet, por u ndëshkuam. Bëmë disa gabime që një skuadër me përvojë nuk mund t’i bëjë. Barazimin mund ta merrnim, mjaftonte të ishim pak më të vëmendshëm.
Mungesat? Nuk dua të flas për to, kisha 16 lojtarë gati. Mendoj se lojtarët dhanë gjithçka. Polonia ishte e fortë fizikisht dhe nuk la hapësira në mbrojtje. Ishim duke bërë zëvendësimet, pasi edhe Bare u dëmtua, pësuam atë gol dhe më pas gjithçka u bë më e vështirë. Në pjesën e parë u ndëshkuam me të verdhë që në faullin e parë me Hysajn. Me gjyqtarët, sidomos me Poloninë, kemi vuajtur, por sot nuk ishin vendimtarë”, - u shpreh Reja.
Trajneri i kuqezinjve shpreson ende për vendin e dytë: “Nuk ka marrë fund, jemi aty dhe është e drejtë të shpresojmë”, - tha Reja, i cili ka dashur të komplimentojë edhe tifozët, sigurisht jo ata që hodhën shishet në fushë: “Komplimente tifozëve, sepse një ambient të tillë është e vështirë ta gjesh dhe lojtarët dhanë maksimumin falë ngrohtësisë së tifozëve”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.