.png)
Këshilli politik i formuar me përfaqësuesit e opozitës jashtëparlamentare, drejtuesve të komisionit të reformës zgjedhore dhe përfaqësuesve të grupeve parlamentare u mblodh sot në zyrat e Bashkimit Europian. Takimi u zhvillua në mjediset e Europa House. Formatit të parë të Këshillit Politik, Damian Gjiknurit, Rudina Hajdarit, Petrit Vasili dhe Oerd Bylykbashit i janë bashkuar edhe grupi i ekspertëve të komisionit të posaçëm parlamentar, Viktor Gumi dhe Ilir Rusmali, si dhe ekspertët e tjerë si Ivi Kaso, Arjan Madhi dhe të Muharrem Cakës si dhe ekspertë të PDIU-së dhe të PS-së. Palët kanë rënë dakord dhe kanë miratuar një kalendar të posaçëm duke përcaktuar 13 etapat sipas datave për paraqitjen e ndryshimeve ligjore që kanë të bëjnë me reformën zgjedhore, por që sipas gjasave nuk do të prekin vetëm Kodin Zgjedhor, por edhe ligje të tjera.
Palët kanë rënë dakord për të paraqitur edhe propozime për ndryshimet e sistemit zgjedhore dhe kjo do të realizohet brenda datës 15 mars. Brenda datës 10 shkurt si hap të parë është propozuar që të paraqiten nisma konkrete për parandalimin dhe goditjen e krimeve zgjedhore, përfshirë masa për rolin e policisë, prokurorisë dhe gjykatave në procesin zgjedhor kundër shitblerjes së votës, presionit mbi zgjedhësit dhe administratën, cenimit të sekretit dhe lirisë së votës dhe abuzimi me burimet shtetërore. Në pikën e dytë të kësaj agjende që përmban të njëjtën datë, 10 shkurtin, duhet të paraqiten propozimet për atë që shihet kushti i opozitës, pra ndarja e politikës nga krimi, nëpërmjet forcimit e zbatimit te procesit të dekriminalizimit me masa shtese. Votimi apo numërimi elektronik, hartimi i listave të zgjedhësve, pajisja me kartën ID dhe shmangia e votimit fiktiv të emigrantëve janë pjesë punës së grupit të ekspertëve. Barazia gjinore dhe vota e emigrantëve jashtë do të jenë pjesë e diskutimeve dhe paraqitjes së drafteve. Sakaq vëmendje do t’i kushtetohet administratës zgjedhore, paanshmërisë dhe propozime për parandalimin e abuzimit me burimet shtetërore dhe administratën publike në periudhën zgjedhore apo dhe propozime për sistemin e ankimimeve gjyqësore dhe administrative.
Hajdari: Mund të preket edhe Kushtetuta. Gjiknuri: PD të sjellë propozimet
Damian Gjiknuri pas këtij takimi e ka cilësuar si ambicioz afatin 15 mars për të realizuar ndryshimet në Kodin Zgjedhor, duke shtuar se mazhoranca ia ka bërë të qartë opozitës dhe kjo u diskutua edhe në grupin e punës, që për këto çështje që ata i mendojnë shumë specifike le të vijnë me propozimet e tyre. “Pra, nëse opozita ka pretendime për forcimin legjislacionit penal, ka çështje të tjera të aspektit organizativ apo propozon skema që mund të jenë më efikase në parandalimin e shkeljeve zgjedhore, le të vijnë me propozime konkrete. Ne do ti shqyrtojmë dhe patjetër nëse janë në përputhje me rekomandimet e ODIHR-it do të bëhen pjesë e legjislacionit zgjedhor. Pra, këtu kemi një dakordësi” tha Gjiknuri. Sipas tij puna do të disa me ato që i cilësoi si më të lehtat për të arritur në konsensus mes palëve. Të gjitha propozimet do të kalojnë filtrin si drafte teknike, pjesë-pjesë për opinion paraprak te ODIHR.
Deputeti i PD-së, Oerd Bylykbashi nga ana e tij ka theksuar se me metodologjinë e re të punës së miratuar i hapet rruga për reformën zgjedhore. Për demokratin të vlefshme janë edhe ato dokumente të miratuar nga komisionin e reformës zgjedhore, në kohën që PD-ja nuk kishte bojkotuar Parlamentin dhe ishte pjesë e diskutimeve. “Ajo që ka rëndësi të thuhet është se dokumenti i sotëm përfshin të gjitha çështjet që kemi ngritur politikisht në Këshillin Politik, ku do të përfshihen, çështja e shitblerjes së votës, ndarjes së politikës nga krimi, probleme të rënda zgjedhore që ndryshojnë dhe manipulojnë votën e shqiptarëve; çështja e sistemit zgjedhor. Të gjitha masa që kanë si emërues të përbashkët, elementin e vullnetit politik për të ndarë shtetin nga politika, shtetin nga partitë politike. Një angazhim dhe një standard i OSBE-së pa të cilin çdo kornizë ligjore pëson fatin e ndryshimeve që janë bërë deri më sot. Ky është thelbësor në procesin që po nisim që nga sot”, deklaroi Bylykbashi. Ndërsa bashkëkryetarja e komisionit të posaçëm të reformës zgjedhore, Rudina Hajdari theksoi se i gjithë ky proces po kryhet nën monitorimin e rreptë të faktorit ndërkombëtarë, si Bashkimi Europian, OSBE-së dhe nga ambasadori i Britanisë së Madhe. Kjo, sipas saj, tregon seriozitetin e angazhimit të faktorit ndërkombëtar që ka ndërmjetësuar mbi të gjitha uljen në një tryezë të PS-së dhe PD-së.
“Nëse e nevojshme do të ketë edhe ndryshime ë Kushtetutë, kjo do të thotë ne do të kemi një ndryshim të sistemit në çdo hallkë të saj, ska ndryshime për makijazh, kjo reformë zgjedhore do të merret e çohet deri në fund. Shpresoj të kemi konsensus për pikat e nxehta”, theksoi Hajdari.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
