Gafa e pabesueshme e Tomas Strakoshës në ndeshjen me Gallatasarajin i kushtoi humbjen Lacios dhe shtypi sportiv e kryqëzoi portierin kuqezi. Disa kanë dashur ta mbështesin, që nga kolegu i tij Muslera, duke e konsideruar atë episod si diçka që ndodh në futboll, veçanërisht për portierët.
Kështu është në fakt, ndodh, por në rastin e Strakoshës ka diçka më shumë. Nuk ishte thjesht një moment i shkëputur. Kuptohet qartë se qëndrimi për një kohë të gjatë në stol ka ndikuar direkt në reflekset e portierit të Kombëtares. Sepse është tjetër gjë stërvitja dhe tjetër gjë ndeshja, ku dinamika është shumë më e lartë. Strakosha ka treguar se është një nga portierët më të mirë të Serisë A, por mosaktivizimi e ka penalizuar shumë për formën sportive.
Që në momentin që Reina, - i ardhur te Lacio për ta ndihmuar me përvojën e tij, - i mori vendin e titullarit, portieri kuqezi nuk ka mundur ta gjejë veten. Madje, trajneri Sarri vetëm në fund vendosi që ai të luante nga minuta e parë në Ligën e Europës, pasi nuk ishte i bindur. Përveç reflekseve të lojës, Strakosha duket se ka humbur edhe besimin në vetvete dhe tani i duhet forcë për të kaluar momentin delikat.
Trajneri i Kombëtares, Edi Reja, ia dha mundësinë të hiqte “ndryshkun” nga dorezat, duke e aktivizuar ndaj San Marinos, pasi në dy ndeshjet e tjera zgjodhi Berishën. Kjo do të thotë se edhe ai nuk është bindur nga forma aktuale e portierit të Lacios. Por ndaj San Marinos Strakosha as që pati mundësi ta vinte veten në provë.
Po ashtu, Reja i besoi fanellën e titullarit edhe Marash Kumbullës në të tria ndeshjet e shtatorit. Edhe mbrojtësi nuk po luan titullar me Romën dhe kjo u reflektua sidomos në ndeshjen e parë me Poloninë, ku Kumbulla hasi vështirësi dhe u kritikua, sidomos nga ish-kapiteni Rudi Vata. Edhe në rastin e tij peshon fakti që nuk po luan rregullisht dhe nuk është në nivelin më të mirë. Mourinjo e aktivizoi vetëm 15 minuta në Ligën e Konferencës.
Është për të ardhur keq, sepse janë dy nga lojtarët më të mirë të Kombëtares, që luajnë me klube të rëndësishme në Itali. Momenti që po kalojnë është vërtet i vështirë dhe u duhet ta përballojnë për të treguar se janë vërtet lojtarë të mëdhenj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.