.png)
Në reagimin e tij të parë zyrtar mbi dëbimin e Ambasadorit Iranian dhe një tjetër diplomati, Teherani zyrtar akuzoi Shqipërinë se ka rënë viktimë e SHBA-së.
Zëdhënësi i Ministrisë së Jashtme Iraniane, Bahram Qasemi thotë se vendi ynë është bërë pjesë e një skenari të disa vendeve për të dëmtuar marrëdhëniet Iran-Europë dhe se situata e tanishme është tejet e ndjeshme.
Duke folur për Agjencinë e lajmeve të Republikës Islamike (IRNA), Qasemi tha se qeveria shqiptare e ka marre këtë vendim në konsultim me SHBA-të dhe disa vende të tjera.
“Irani ka gëzuar gjithmonë marrëdhëniet e përzemërta me Shqipërinë dhe ka respektuar të gjitha rregullat dhe rregulloret e këtij vendi europian bazuar në parimet e politikës së jashtme të Republikës Islamike", shtoi ai.
"Duke pasur parasysh se SHBA ishte vendi i parë që shpalli qëndrimin e tij mbi këtë çështje dhe Shqipëria tha se vendimi ishte marrë në bashkëpunim me shërbimet e sigurisë të vendeve të tjera, është e qartë se Uashingtoni dhe Tel Avivi fshihen pas këtij vendimi”, shpreh ai.
Shqipëria ka dëbuar ambasadorin e Iranit në vendin tonë, Gholamhossein Mohammadnia, për cenim të sigurisë kombëtare. Gjithashtu mësohet se është dëbuar dhe shpallur “non grata” edhe një diplomat tjetër i ambasadës iraniane emri i të cilit ende nuk bëhet i ditur.
Pas këtij vendimi, Presidenti Donald Trump, Sekretari Amerikan i Shtetit, Mike Pompeo dhe Këshilltari John Bolton kanë përshëndetur vendimin e Tiranës për të dëbuar ambasadorin iranian si dhe një punonjës tjetër, pasi sipas Washingtonit, komplotuan sulme terroriste në Shqipëri.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
