.png)
Qeveria është ende duke studiuar planin për një masë, që Rama thotë se do të jetë e përkohshme, rritjeje të çmimit të energjisë elektrike për familjet e pasura.
Rama nuk dha shumë detaje se si do të jetë skema që do të përcaktojë se kush është i pasur, e rrjedhimisht duhet të paguajë më shumë për një kilovat energjie elektrike, por përjashtoi zbatimin e një fashe konsumi, ashtu siç ishte para 2014-s.
"Në këtë paketë, ne i qëndrojmë, edhe sot që flasim, asaj që kemi vendosur të bëjmë, që nuk do ta rrisim çmimin e energjisë elektrike për asnjë familje shqiptare. Në ndërkohë, Ministria e Energjisë po bën një studim për familjet e pasura, jo për të rikthyer ato fashat e tmerrshme që na çuan në katastrofë totale dhe na lanë në buzë të humnerës në vitin 2013, por për të parë nëse mund të bëjmë një ndarje të përkohshme ku ata që kanë më shumë, të paguajnë më shumë në faturën e energjisë", thotë Kryeministri.
Për pjesën tjetër, Rama tha se nuk do të ketë rritje të faturës së energjisë elektrike, ku qeveria do të vazhdojë të paguajë diferencën në çmim.
Fasha mbrojtëse, që u hoq nga Rama në mandatin e parë qeverisës, në atë kohë ishte 300 kw për orë. Familjet që harxhonin energji më pak se kjo shifër e paguanin atë me 7 lek kilovati, ndërsa familjet që e tejkalonin atë e paguanin me 13.5 lek kilovati.
Rama e hoqi këtë fashë në mandatin e parë, duke e mesatarizuar çmimin e energjisë elektrike për të gjithë në 9.5 lek kilovati.
Në fjalën e mbajtur në Kuvend, Kryeministri përsëriti gjithashtu qëndrimin se nuk do të heqë asnjë taksë nga nafta.
“Taksat nga nafta nuk do të lëvizin, as me fakte alternative të fabrikuara për luftë politike, as me shpifje e as me protesta. Ajo që ka rëndësi për ne është që të mos lëvizë çmimi i energjisë për familjet, pensionistët, shtresat në nevojë dhe për biznesin e vogël. Kjo ka shumë rëndësi, sepse nëse ne rrisim energjinë për biznesin e vogël, kostoja mesatare e ulët është 35-45 mijë lek, që do të thotë automatikisht i heqim një vend pune. Kjo do të thotë 95 mijë të papunë direkt”, tha Rama.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
