.png)
“Sabri Godo do të kishte vetëm 91 vite sot, e kur ishte ende shumë larg kësaj moshe, të tërë e thërrisnin, Plaku Godo. Në fakt nuk ishte Sabriu plak, por ishin shumë kalamaj mesoburrat e politikës adoleshente të atyre viteve të tranzicionit shqiptar”, shkruan Edi Rama në kujtim të një prej personazheve të rëndësishëm të politikës shqiptare në këto 30 vite.
“E kam njohur pak Plakun Godo, por kishim një simpati reciproke në distancë, bashkë me rezervën për përkatësinë në kampe të kundërta politike. Atij i dukej ironike që unë, "gjatoshi gjuhëshpatë" i Lëvizjes Studentore, të isha majështiza e ombrellës rozë të socialistëve, mua më dukej satirike që ai, "gjarpëroshi mendjemprehtë" i Shqipërisë letraro-politike, të ishte fundbishti i ombrellës blu të demokratëve”, thotë Rama, i cili kujton edhe kohën kur ishte kryetar i Bashkisë së Tiranës. “Kjo në fakt tregon që simpatia për personazhin e tjetrit ishte prej vërteti dhe më kujtohet njëherë, kur Plaku Godo erdhi tek unë në bashki për të zbutur një situatë konflikti politik, e vetmja pjesë ku u morëm vesh ishte admirimi im për librin e tij "Ali Pashë Tepelena" dhe admirimi i tij për punën time në bashkinë e Tiranës. E vetmja nuancë në këmbimin e admiratave, ishte se unë, "gjatoshi", i tregova Plakut mbresat e mia për Aliun e tij të jashtëzakonshëm, ndërsa ai, "gjarpëroshi", më tregoi mua mbresat e jashtëzakonshme të zonjës së tij fisnike për punën e kryebashkiakut”, vijon Rama, i cili thekson se nuk është ai njeriu i duhur për të vlerësuar kontributin e Sabri Godos në politikën shqiptare. Por referuar konfliktualitetit të politikës shqiptare që vijon prej 30 vjetësh, nuk mund të mos e vecojë nga të tjerët. “Dua s'dua, s'mund të jem dot objektiv. Prandaj le të mos ma marrë kush për keq kur them se Plakun Godo do ta kujtojnë, me respekt padyshim, ata që e njohën e ndonjë tjetër që do ta njohë më tutje - ndokush që do të ketë taksiratin të bëjë ndonjë studim për skenën e rrëmetshme politike të kohës. Por pikë dyshimi nuk kam se autorin e kamares së hatashme biografike të "Ali Pashë Tepelenës", do ta admirojnë brezat e lexuesve dhe lëvruesve të letrave shqipe”, përfundon Rama.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
