Kryeministri Edi Rama thotë se zyra e tij është në kontakt me autoritetet greke për të anuluar gjobat që u janë vendosur shqiptarëve që kanë shkelur afatin 90-ditor të qëndrimit në Greqi gjatë krizës së pandemisë.
“Autoritetet greke do të rishikojnë të gjitha gjobat e vendosura, ndërkohë që kanë siguruar se në kohëzgjatjen e pandemisë vendosja e gjobave do të ndodhë vetëm në rastet flagrante, ku shkelja e afateve nuk ka lidhje me situatën e krijuar nga Covid19”, deklaron ai.
Për pjesën që nuk do t’u anulohet gjoba, Rama thotë se Qeveria shqiptare do t’ua rimbursojë në masën 100 për qind.
“Unë i siguroj të gjithë qytetarët shqiptarë, të cilëve autoritetet greke nuk do t’ua anulojnë gjobën, se do të rimbursohen në masën 100 për qind nga Qeveria e Republikës së Shqipërisë”, shkruan Kryeministri përmes një postimi në rrjetet sociale.
Ditët e fundit qytetarët shqiptarë kanë denoncuar me dhjetra raste kur janë gjobitur nga pala greke gjatë rikthimit në Shqipëri për shkelje të afatit 90-ditor të qëndrimit në Greqi. Gjobat e vendosura variojnë nga 600 deri në 1200 euro, ndërkohë që ka raste kur penalitetet shkojnë edhe me heqjes të së drejtës për të hyrë në Greqi për 5 vjet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.