Gazeta Si - Prokuroria e Tiranës ka bërë rekurs për lirimin e ish-luftëtarit të UÇK-së Dritan Goxhaj, duke kërkuar rikthimin e tij në burg dhe ekzekutimin e Gjykatës Speciale të Kosovës për ekstradimin e tij.
I arrestuar për llogari të Gjykatës Speciale në Kosovë, Gjykata e Apelit në Tiranë vendosi lirimin e tij nga qelia në 10 tetor, edhe pse akuzohej për kryerjen e veprave penale “Frikësimi gjatë procedurës penale” dhe “Pengimi i personit zyrtar në kryerjen e detyrave zyrtare”, parashikuar nga legjislacioni penal i Republikës së Kosovës.
Shorti ka caktuar si gjyqtarë që do të shqyrtojë kërkesën në Gjykatën e Lartë Ilir Pandën, teksa ende nuk është caktuar një datë dhe orar për seancën gjyqësore.
Në objektin e rekursit kërkohet pranimi i dhënies se ndihmës juridike Zyrës së Prokurorit të Specializuar të Kosovës dhe ekzekutimin e Letërporosisë.
Caktimin e masës së sigurimit personal me karakter shtrëngues "Arrest në burg" me qëllim ekstradimi. Lejimin e kontrollit personal të shtetasit Dritan Goxhaj, të vendbanimit dhe të vendit të arrestimit të tij, si dhe sekuestrimin e materialeve gjatë kontrollimit të tyre.
Gjithashtu në kërkesë parashtrohet objekti për caktimin e datës dhe vendit të kryerjes së procedurës së ekstradimit si dhe lejimin e përfaqësuesve të Dhomave të Specializuara të Kosovës që të jenë të pranishëm dhe të vëzhgojnë procedurat gjyqësore shqiptare përkatëse në lidhje me zbatimin e kësaj kërkese për bashkëpunim dhe ndihmë.
Ish-luftëtari i UÇK-së u arrestua në korrik të vitit të kaluar, në zbatim të një urdhër-arresti të lëshuar nga Gjykata Speciale e Kosovës, me qëllim ekstradimin e tij në Hagë.
Por Gjykata e Apelit në kryeqytet ka rrëzuar vendimin e Shkallës së Parë, duke refuzuar ekstradimin dhe liruar ish-luftëtarin e UÇK-së.
Gjyqtari Gent Shala vendosi refuzimin e ekstradimit dhe urdhëroi lirimin e menjëhershëm nga paraburgimi.
Ai akuzohet për nxjerrjen e të dhënave të bashkëpunëtorëve të drejtësisë në çështjet që kanë të bëjnë me luftën në Kosovë.
Prokuroria Speciale e Kosovës po heton Goxhajn për intimidim të dëshmitarëve në procesin në Hagë kundër drejtuesve të Ushtrisë Çlirimtare të Kosovës nëpërmjet një postimi në Facebook.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.