.png)
Gazeta Si - Ardit Kërtusha, 31 vjeç, ish-kandidat për kreun e PS në Durrës, ka mbetur i plagosur me armë zjarri mesditën e të hënës.
Ngjarja ka ndodhur në lokalin që administrohet nga një reper i njohur në vend, i cili ndodhet në bregdetin e Durrësit.
Kërtusha ka qenë duke pritur disa persona në ambientet e jashtme të lokalit që ndodhet në lagjen nr.1 të qytetit.
Autori i është afruar dhe fillimisht kanë debatuar. Më pas ai e ka qëlluar 31-vjeçarin me armë në këmbë.
Zanafilla e këtij sherri, dyshohet se ka nisur para një muaji, kur autori dhe Kërtusha janë rrahur me njëri-tjetrin. Policia e ka identifikuar autorin dhe është vënë në ndjekje të tij.
Ai është dërguar me urgjencë në spital, ku ndodhet nën kujdesin e mjekëve, jashtë rrezikut për jetën.
Kërtusha ka qenë një personazh edhe mediatik, pasi në disa raste ka denoncuar kapjen e kupolës drejtuese të PS-së së Durrësit nga ish-kryebashkiaku Vangjush Dako.
Sakaq, policia e qytetit bregdetar vijon krehjen e zonës, për identifikimin dhe kapjen e autorit.
Po shtu, grupi hetimor ndodhet në vendngjarje dhe po punon për sqarimin e plotë të rrethanave të ngjarjes.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
