Mjeku infeksionist Pëllumbi Pipero me anë të një deklarate për median tha se pacienti 61-vjeçar që u deklarua si vdekur nga pasojat e shkaktuara nga Covid-19 në mëngjesin e së hënës, rezultoi se kishte pësuar vdekje klinike. Mjekët e Infektivit kanë bërë të pamundërën dhe e kanë kthyer në jetë, por sipas Piperos, ai ndodhet në gjendje të rëndë.
Pipero thekson se në spitalin Infektiv janë mbi 40 të shtruar. "Situata është dinamike, sa i përket rasteve të reja, ndjekjes së pacientëve të prekur, kemi më shumë se 40 të shtruar me problematika të ndryshme. Njëri nga rastet ka bërë vdekje klinike që zgjati gjatë, por mjekët reanimatorë e kthyen në jetë, vijon të jetë rëndë”, deklaroi Pipero.
Identiteti i këtij pacienti është zbuluar nga Inspektori i Përgjithshëm i Republikës, Shkëlqim Hajdari, i cili shprehet se e ka mik prej vitesh. “Skënder Kurti, mik i imi prej 30 vjetësh, në gjendje shumë të rëndë prej Covid-19. Kush e njeh do vinte bast, që me shëndetin që ka, jetën që ka bërë (sport gjithë jetën, jo alkol, jo cigare), nuk do ta infektonte kurrë virusi”, shkruan Hajdari në një postim të tijin.
Ndërkaq mjeku Pipero bëri të ditur se vdekja klinike ishte e gjatë dhe se mjekët nuk e humbën shpresën dhe bënë gjithçka që është mundur për ta rikthyer në jetë.
"Në këtë situatë, në këtë lloj dinamike të zhvillimit të pandemisë në vendin tonë, të rasteve të shtuara edhe këtu tek Ne, por edhe rasteve të konfirmuara çdo ditë, vazhdoj të këmëngul e t’iu them të gjithë qytetarëve, të jenë të duruar, të qëndrojnë sa më gjatë në shtëpi dhe nëse kanë nevojë mjafton të telefonojnë në numrin 127” tha Pipero.
Ndërsa mësohet se 61-vjeçari që pësoi vdekje klinike ka qenë sportist dhe ish-trajneri i boksit. Në Shqipëri aktualisht janë regjistruar katër vdekur nga sëmundja e koronavirusit, ndërsa numri i të prekurve është rritur ndjeshëm, duke mbushur pothuajse gjysmën e shtrerëve të spitaleve të parashikuar për Covid-19.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.