.png)
Gazeta Si - Kupa e Shqipërisë do të njohë sot dy skuadrat finaliste të saj, pasi të zhvillohen edhe dy gjysmëfinalet e kthimit. Njëra me shumë mudësi do të jetë Laçi, që ndeshjen e parë në Durrës e ka fituar me rezultatin 1-2. Kurbinasit kanë avantazhin që në fushën e tyre u mjafton të mos humbasin, ndërsa Teuta do të bëjë gjithçka për përmbysjen, sepse Kupa mund ta çojë në Europë.
Krejtësisht e hapur është gjysmafinalja tjetër mes Vllaznisë dhe Partizanit, që zhvillohet në Shkodër, në orën 17:45. Akti i parë mes këtyre dy skuadrave u mbyll në barazim, 0-0, me shkodranët që ende vazhdojnë të ‘qajnë’ golin e anuluar të Aralicës, që të gjithë më pas e konsideruan të rregullt.
Vllaznia nuk po kalon një moment të mirë që pas largimit të trajnerit Tomas Bërdariç. Në kampionat rrezikon të mbetet jashtë zonës europiane dhe Kupën e sheh si një mundësi më të mirë për të shmangur dështimin e sezonit. Me përkrahjen e tifozëve, shkodranët do të synojnë vetëm fitoren.
Edhe Partizani ka rrezikuar shumë këtë sezon. Në kampionat është ngritur disi javët e fundit, por nuk ka asgjë të sigurt, ndaj dhe Kupa ka marrë vëmendjen maksimale të të kuqve. Pritet një ndeshje shumë e zjarrtë në Shkodër, njëkohësisht edhe shumë e kujdesshme, sepse çdo gabim mund të ketë kosto të lartë për secilën nga skuadrat.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
