Kombetarja

Për turp, kombëtarja e 17-vjeçarëve mundet 6-0

Vijojnë rezultatet negative të ekipeve kombëtare edhe të moshave. Përfaqësuesja U-17 është ajo që bën ndeshjen tjetër turpruese për fanellën kuqezi. Djemtë e drejtuar nga trajneri Xhemal Mustedanagiç janë mposhtur në shifrat 6-0 nga Çekia.

Ndeshja e zhvilluar në “Elbasan Arena” nuk kishte shumë histori, me 17-vjeçarët shqiptarë që u dorëzuan që në minutat e para. Çekët tregohen superiorë në çdo aspekt, duke mos i lënë asnjë mundësi futbollistëve kuqezinj. Në çdo 10 minuta futbollistët nga Çekia dukej sikur kishin rezervuar nga një gol kundër skuadrës sonë, që luante pa asnjë lloj motivi. Pjesa e parë e ndeshjes do të mbyllej me rezultatin e thellë 4-0.

Në 45’ minutat e dyta, loja është pak më e ekuilibruar për shkak se çekët ulin tempin, por edhe se Shqipëria luan disi më e organizuar. Gjithsesi nuk do të vononte shumë edhe goli i pestë, që ktheu në goleadë turpi këtë ndeshje për skuadrën tonë. Por për të kompletuar këtë turpërimin në “Elbasan Arena” do duhej të vinte minuta e 88-të, kur çekët shënuan edhe golin e gjashtë. Shqipëria provoi gjatë pjesës së dytë për të shënuar të paktën një gol nderi, por pa mundur do t’ia dalë mbanë.

Kjo disfatë e thellë që në ndeshjen e parë është disi zhgënjyese për ekipin kuqezi, duke pasur parasysh që në krye të pankinës është Xhemal Mustedanagiç. Tekniku boshnjak prej disa muajsh ka marrë pozicionin e drejtorit të talenteve në Federatën Shqiptare të Futbollit dhe prej tij pritet shumë. Kjo ishte ndeshja e parë kualifikuese për kombëtaren tonë për në kampionatin europian. 17-vjeçarët kuqezinj bëjnë pjesë në Grupin 8, së bashku me Norvegjinë, Azerbajxhanin dhe Çekinë, ku shanset për kalimin në raundin tjetër janë minimale.

Formacionet zyrtare të të dyja skuadrave:

Shqipëria: Ceka, Shehu, Zaimi, Smajlaj, Doda, Arapi, Stafa, Mitaj, Kuqi, Memushaj, Cahani

Çekia: Stejskal, Helebrand, Kurka, Hajek, Kronik, Vojatshke, Svoboba, Hlzek, Steri, Kozeluh, Vorlshki


Copyright © Gazeta “Si”


Më Shumë