Partia Demokratike akuzon se Edi Rama shtrembëroi raportet e organizmave dhe institucioneve ndërkombëtare dhe se rritja ekonomike për të cilën flet është imagjinare dhe mashtrim për shqiptarët.
“Rënia ekonomike e Shqipërisë është 7.5% dhe të gjithë institucionet ndërkombëtare flasin qartë dhe thonë që Rama ka qenë i paaftë, ka dështuar për ta menaxhuar krizën e pandemisë por njëkohësisht edhe tërmetin. Ai nuk diti që të përballet me krizat e njëpasnjëshme që kaloi vendi, ka dështuar dhe po dështon çdo ditë e më shumë. Ndaj nuk i ka mbetur vetëm se të gënjejë publikisht edhe për fakte që janë publike”, deklaroi ish-deputetja demokrate, Jorida Tabaku.
Duke e quajtur “Kryeministri në ikje i Shqipërisë”, Tabaku thotë se në mungesë të një oferte reale për shqiptarët Rana u krenua me një raport të “The Economist” mbi lirinë dhe demokracinë në vendin tonë.
“Ai do të na shesë ne sikur në Shqipëri jemi më demokratikë megjithëse në 8 vite të rilindjes së tij vendi ka pasur një rënie të të gjithë treguesve që kanë lidhje me demokracinë dhe lirinë e individëve. Shqipëria ka pasur një përparim qesharak në 7 vitet e fundit në këtë raport dhe ky përparim që e kaloi Shqipërinë nga grupi i vendeve me demokraci hibride në grupin e vendeve me demokraci të lëkundur, është rezultat i vetëm një elementi dhe i një faktori, miratimi i Kodit Zgjedhor dhe marrëveshja e 5 qershorit”, tha ajo.
Tabaku iu referua më pas OSBE-së, Greco-s, Global Initiative Network e të tjerë, që sipas saj kanë të përbashkët identifikimin e procesit elektoral si në regres.
Ndërkohë që pak javë më parë u njohëm edhe me raportet e antimafias dhe të Ndragetës që e tregojnë Shqipërinë si parajsë të pastrimit të parave.
“Mburrjet e tij për një Shqipëri demokratike dhe të lirë janë një tjetër gënjeshtër 3D, njësoj si projektet që paraqet nëpër Shqipëri që duan të manipulojnë qeverisjen negative të vendit. Askush nuk e beson këtë, askush nuk e beson se si përdhunshëm u prish Teatri në mbrëmjen e 17 majit, se si u rrahën qytetarët, se si u tërhoqën zvarrë gazetarët”, thotë ish-deputetja e PD.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
