.png)
Kreu i Grupit Parlamentar të PD-së, Edmond Spaho, ka publikuar sot provën, e cila sipas tij tregon se si buxheti i shtetit është vënë në shërbim të trafikantëve të drogës.
Qeveria i ka dhënë tenderë publikë kompanisë “Inerte Expres”, e cila zotërohet nga biznesmeni Mondi Bega. Bosi i dënuar për trafik droge me 21 vjet burg në Itali, ka përfituar së fundmi një tender 100 milionësh nga OST-ja.
“Të dhënat zyrtare tregojnë se kompania “Inerte Express”, me pronar trafikantin e drogës dhe mikun e familjes së Taulant Ballës, nuk ka përvojë në ndërtimin e nënstacioneve elektrikë dhe se këtë funksion ai e shtoi në fund të dhjetorit 2017. Pak muaj më vonë, kompania pa përvojë e mikut trafikant droge të Taulant Ballës përfitoi një tender publik nga OST me vlerë 100 milionë lekë të reja”, deklaroi Spaho.
Kreu i grupit parlamentar të Partisë Demokratike akuzoi Taulant Ballën se ka shërbyer si sekser për t’i dhënë para nga Buxheti i Shtetit mikut të tij, Edmond Bego.
“Balla duhet t’u thotë shqiptarëve a ka bërë ai sekserin me OST-në, që miku i tij trafikant droge të fitojë një tender prej 100 milionë lekë? Sa më shumë të heshtë Taulanti pa sqaruar çfarë e lidh atë me miqësi familjare me një trafikant të rrezikshëm droge, që autoritetet italiane e kanë dënuar me 21 vjet burg, aq më shumë forcohet bindja për rolin e Taulant Ballës si sekser të miliona eurove që ua merr shqiptarëve për t’i ndarë me trafikantin e drogës”, thekson ai.
Taulant Balla e ka pranuar njohjen me biznesmenin, por është shprehur se nuk i është ofruar mburojë politike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
