.png)
Një ditë përpara se Komisioni i Pavarur i Kualifikimit të japë vendimin për drejtuesen e Prokurorisë së Krimeve të Rënda, Donika Prela, si pjesë e procesit të vettingut, Partia Demokratike e akuzon se ajo është kapur në përgjimet e bandës së Avdylajve. Deputeti demokrat Enkelejd Alibeaj nëpërmjet konferencës për shtyp theksoi se organet e vettingut duhet t’i japin përgjigje pyetjes: A është Donika Prela pjesë e dosjes 339, e kapur në përgjim me bandën e Avdyljave duke biseduar me kreun e bandës Astrit Avdylaj?
“Përgjimet e dosjes 339 janë bërë në kohën kur Donika Prela drejtonte Prokurorinë e Durrësit dhe Astrit Avdylaj u arrestua për armëmbajtje pa leje, por më pas u lirua si i pafajshëm. Komisioni i Pavarur i Kualifikimit ka përgjegjësinë të bëjë verifikim të plotë për Drejtuesen e Prokurorisë së Krimeve të Rënda. Një prokuror i korruptuar dhe me lidhje me krimin e organizuar nuk mund të japë drejtësi! Organet e Vettingut kanë përgjegjësinë të mos lejojnë që një prokurore me pasuri të pajustifikuar, e dyshuar për lidhje me krimin e organizuar të drejtojë strukturat më të rëndësishme në luftën kundër krimit të organizuar dhe korrupsionit”, theksoi demokrati Alibeaj.
Për PD-në, Prela është takuar me një nga anëtarët e KPK-së, Valbona Sanxhaktari, e cila pritet të japë vendimin për drejtuesen e Prokurorisë së Krimeve të Rënda.
“Përpara se të japë vendimin për Donika Prelën, KPK duhet të verifikojë nga kamerat e sigurisë a është takuar Donika Prela në nëntor-dhjetor me anëtaren e vetingut Valbona Sanxhaktari dhe a është pjesë e dosjes 339, duke u kapur në përgjim me Astrit Avdylajn. Për lehtësi pune, i sugjerojmë Komisionit të Pavarur të Kualifikimit të kërkojë kamerat e Sigurisë së Prokurorisë së Krimeve të Rënda në muajt nëntor-dhjetor”, theksoi Alibeaj.
Për opozitën rasti i drejtueses së Prokurorisë së Krimeve të Rënda Donika Prela po konfirmon se Komisioni i Pavarur i Kualifikimit është një vegël në duart e pushtetit për të mbajtur në sistem prokurorë dhe gjyqtarë të korruptuar dhe se në dosjen e Donika Prelës ka dokumente që provojnë se miliona lekë nga pasuria e saj janë të pajustifikuar, se bashkëshorti i saj dyshohet për pastrim parash dhe se, në rastin më të mirë, ai ka punuar në të zezë.
“Operacioni Ndërkombëtar i Monitorimit bëri një përpjekje të lavdërueshme për të hedhur dritë mbi aktivitetin e paligjshëm të Donika Prelës, por Komisioni i Pavarur i Kualifikimit është urdhëruar të mbajë në sistem një tjetër prokurore të korruptuar, të shantazhueshme nga politika dhe nga bandat”, theksoi Alibeaj.
Më 22 janar, Donika Prela doli përpara KPK-së në një seancë dëgjimore përpara trupës gjykuese trupa gjykuese e drejtuar nga Roland Ilia, Olsi Komici dhe Valbona Sanxhaktari.
Përfaqësuesit ndërkombëtar të Operacionit Ndërkombëtar të Monitorimit, ONM, Nga ONM-ja është kërkuar informacion për hetimin e Emiliano Shullazit dhe Gilmando Danit për periudhën maj-tetor 2018. Subjekti ka paraqitur raport shpjegues. ONM-ja i ka kërkuar llogari Donika Prelës pse u bllokua pretenca për Emiliano Shullazit.
Përfaqësuesi i ONM, Teo Jacobs i kërkojë gjithashtu llogari prokurores Prela për t’i vërtetuar me dokumente se përse kompania në fjalë nuk i kishte paguar sigurimet shoqërore për 3 vite bashkëshortit. Jacob kërkoi informacion më të detajuar nëse bashkëshorti i saj ishte një viktimë e punëdhënësit, apo kishte bashkëpunuar me të për të mos paguar taksa në shtet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
