.png)
Dueli për titullin kampion nuk është vetëm në fushën e lojës, por edhe në merkato. Pasi Skënderbeu zyrtarizoi afrimin e Toskiç paraditen e kësaj të mërkure, ka ardhur kundërpërgjigja nga Partizani. “Klubi i kuq” ka njoftuar arritjen e marrëveshjes me mesfushorin Dilaver Duka.
Lajmi është bërë i ditur nga vetë Partizani përmes një njoftimi për mediet, ku shkruhet se pasi Duka kaloi testet është gjetur gjuha e përbashkët për të firmosur marrëveshjen.
Kontrata e firmosur e Dukës me Partizanin do të jetë e vlefshme për pjesën e mbetur të këtij sezoni futbollistik me opsion rinovimi edhe për vitin e ardhshëm. Mesfushori shqiptar gëzon një karrierë të suksesshme në kampionatin profesionist të Shteteve të Bashkuara të Amerikës ku ka qenë pjesë e ekipeve elitare New York Red Bulls dhe Chicago Fire. Duka do të provojë eksperiencën e parë në kampionatin tonë dhe do të mbajë në fanelë numrin 28.
Duka ishte një kërkese personale e trajnerit Skënder Gega që e njihte futbollistin që në Amerikë. Edhe pse nuk ishte në formën e tij optimale, Duka i bindur drejtuesit e Partizanit që të investojnë tek ai. Duka nuk pritet të jetë një zgjedhje e parë për Partizanin, por me eksperiencën e tij pritet të jetë një alternativë shumë e vlefshme për të bërë diferencën, kur të lindë nevoja.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
