Janë mbyllur ndeshjet e javës së tretë të Superiores, që kanë dhuruar edhe surpriza, siç është humbja 0-3 e Skënderbeut në Korçë ndaj Bylisit, që nuk kishte asnjë pikë më parë. Kukësi nuk shkoi më shumë se barazimi me Laçin në “Loro Boriçi”, ndërsa Partizani vazhdon ngjitjen, pas fitores 1-0 ndaj Flamurtarit në kryeqytet. Të shtunën, Tirana fitoi 0-2 në Shkodër ndaj Vllaznisë, ndërsa Teuta mundi me lehtësi Luftëtarin.
E papritur ishte humbja e Skënderbeut në fushën e tij, edhe pse skuadra e trajnerit Ilir Daja ka pasur jo pak vështirësi në organizim para nisjes së kampionatit. Ishte një “harakiri” para tifozëve, pasi Skënderbeu u mund nga Bylisi i ngjitur nga Kategoria e Parë. Peposhi, Guindo dhe Hidi shënuan golat e ballshiotëve, i fundit me penallti. Partizani realizoi objektivin, duke fituar 1-0 ndaj Flamurtarit në krizë identiteti, por ndeshja u komplikua disi. Sulmuesi Solomon, pak pasi shënoi golin e fitores, u ndëshkua me karton të kuq për një faull të rëndë. Gjithsesi, të kuqtë ia dolën ta ruanin rezultatin dhe të merrnin 3 pikët e radhës. Ishte fitorja e dytë radhazi minimale, pas asaj me Luftëtarin në Gjirokastër, me gol të Telushit.
Kukësi dhe Laçi barazuan 1-1 në stadiumin “Loro Boriçi” të Shkodrës. Madje, skuadra e trajnerit Shpëtim Duro barazoi në fundin e ndeshjes me Mustën, pasi më parë Laçi kishte kaluar në avantazh. Për Laçin e Starovës ishte pika e parë, kurse Kukësi është ndalur pas dy fitoresh radhazi. Renditjen e kryeson Tirana me 7 pikë, po aq sa Kukësi, ndërsa Partizani dhe Skënderbeu kanë nga 6 pikë. Flamurtari dhe Luftëtari nuk kanë marrë ende pikën e parë në kampionat.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.