Pas trajnerit Dritan Mehmeti, Partizani ka zyrtarizuar edhe afrimin e parë të merkatos së dimrit, që është mesfushori Sherif Kallaku. Bëhet fjalë për një huazim deri në fund të sezonit nga skuadra kroate e Lokomotivës së Zagrebit.
“Partizani njofton arritjen e marrëveshjes me Sherif Kallakun. Mesfushori ashkohet me 16 herë kampionët e Shqipërisë pas eksperiencave të suksesshme në kampionatin tonë me Laçin dhe Teutën, si dhe jashtë vendit te Lokomotiva Zagreb. Drejtuesit dhe mesfushori kanë arritur marrëveshjen me klubin kroat për huazimin e 23-vjeçarit, i cili do të jetë pjesë e të kuqve deri në fund të këtij sezoni futbollistik”, - shkruan Partizani në faqen e tij zyrtare.
Nga Partizani pritet të largohet ish-mesfushori i Kombëtares, Ergys Kaçe. Lojtari që ka pagën më të lartë në Superiore nuk ka mundur të tregojë asgjë deri tani me fanellën e kuqe dhe palët janë drejt ndarjes, por më parë duhet të bien dakord për prishjen e kontratës.
Një afrim të rëndësishëm ka bërë edhe Teuta, skuadra kampione në fuqi, që ka rikthyer sulmuesin Rubin Hebaj. “Teuta komunikon marrëveshjen me futbollistin Rubin Hebaj. Drejtuesit e klubit dhe sulmuesi kanë gjetur akordin për bashkëpunim dhe lojtari është prezantuar nga shefi i klubit, Enid Furxhi. Hebaj rikthehet në Durrës pas eksperiencës te Shkëndija e Tetovës. Sulmuesi është bashkuar sot me ekipin”.
Ky është edhe njoftimi zyrtar i Teutës për rikthimin e Hebajt. Nga durrsakët është larguar pak ditë më parë sulmuesi Giorgiev, që nuk u ngjit në nivelin e pritshëm.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.