Paloka: Rama si Millosheviçi, do kompensojmë banorët me vlerën e tregut

Ish-deputetët e Partisë Demokratike kanë shkuar në zonën e Astirit ku është paralajmëruar prishja e 33 objekteve si pjesë e zbatimit të projektit për ndërtimin e Unazës së Madhe. Policë të shumtë bllokuan pjesën e zonës së të rrotullimit te “Shqiponja”, duke bllokuar qarkullimin e mos lejuar hyrjen e banorëve të zonës. Nënkryetari i Partisë Demokratike, Edi Paloka në një prononcim për mediat në vendin e ngjarjes u shpreh se opozita ka një marrëveshje me banorët e Unazës së Re dhe në momentin kur të vijë në pushtet dhe të drejtojë vendin, banorët do të kompensohen me vlerën e tregur për çdo dëm të bërë nga qeveria “Rama”.

“Dhunën dhe terrorin e ushtruar ndaj tyre nuk ka kompensim që mund ta dëmshpërblejë, veçse dita kur prangat të vihen në duart e Ramës dhe Veliajt. Ata po e bëjnë këtë shkatërrim, këtë dhunë dhe terror vetëm për të futur disa miliona euro më shumë në xhepat e tyre të qelbur. Projekti i Unazës është kapur në dhjetëra shkelje, falsifikime dhe akte korruptive. Ata që i kanë kryer këto akte janë në krye të shtetit, kurse banorët e shkretë dhunohen, burgosen, helmohen me gaz, bashkë me fëmijët. Gjysma e tyre, ose janë në spital, ose janë në burg”, theksoi Paloka.
Numri dy i PD-së, deklaroi se gazetarët nuk janë lejuar në në momente qetësi dhe jo kur janë hedhur gaz mbi banorët.

“Ne do të vazhdojmë të qëndrojmë, por këtu nuk jemi më në Shqipërinë e vitit 2019-të, jemi në Kosovën e pushtuar nga serbët. Ne jemi me duar, këta me të gjitha mjetet e represionit. Çfarë ndodhi në Kosovën e sulmuar nga Millosheviçi, që shqiptarët u detyruan të braktisin shtëpitë e tyre, ajo po ndodh këtu. Këtu jemi ne dhe përballë kemi serbë. Kemi dashnorin e Vuçiçit që e patë që u puth me të, ju thashë erdhi këtu të sulmojë shqiptarët dhe serbët që janë në shërbim të tij. Kjo është situata”, deklaroi Paloka.