OBSH: Më shumë se një miliard njerëz obezë në mbarë botën

Nga Gazeta Si- Më shumë se një miliard njerëz janë obezë në mbarë botën, tregojnë vlerësimet globale të publikuara në The Lancet, kryer nga OBSH.

Kjo përfshin rreth 880 milionë të rritur dhe 159 milionë fëmijë, sipas të dhënave.

Normat më të larta janë në Tonga dhe Samoa Amerikane për gratë dhe Samoa dhe Nauru Amerikane për burrat, me rreth 70-80% të të rriturve që jetojnë me obezitet.

Ekipi ndërkombëtar i shkencëtarëve thotë se ka nevojë urgjente për ndryshime të mëdha në mënyrën se si trajtohet obeziteti.

Obeziteti mund të rrisë rrezikun e zhvillimit të shumë problemeve serioze shëndetësore, duke përfshirë sëmundjet e zemrës, diabetin e tipit 2 dhe disa lloje kanceri.

Studiuesi i lartë Prof. Majid Ezzati, i Kolegjit Imperial në Londër thotë se në shumë prej vendeve ishullore, obeziteti varet nga disponueshmëria e ushqimit të shëndetshëm në krahasim me ushqimin jo të shëndetshëm.

“Në disa raste ka pasur fushata marketingu agresive që promovojnë ushqime të pashëndetshme, ndërkohë që kostoja dhe disponueshmëria e ushqimit më të shëndetshëm mund të jetë më problematike”.

Prof. Ezzati, i cili ka vite që shikon të dhënat globale, thotë se është i befasuar me shpejtësinë që ka ndryshuar kurba, me shumë vende që tani përballen me një krizë obeziteti, ndërsa numri i vendeve ku njerëzit janë nën peshë dhe konsiderohet si shqetësimi më i madh, ka rënë.

Raporti, që përfshin vitet 1990 dhe 2022, zbuloi se shkalla e obezitetit u katërfishua tek fëmijët dhe adoleshentët. Ndërkohë për të rriturit, norma është më shumë se dyfishuar tek femrat dhe gati trefishuar tek meshkujt.

Në të njëjtën kohë, përqindja e të rriturve të klasifikuar si nënpeshë ka rënë me 50%, por studiuesit theksojnë se ende mbetet një problem urgjent, veçanërisht në mesin e komuniteteve më të varfra.

Drejtori i përgjithshëm i Organizatës Botërore të Shëndetësisë (OBSH) Dr Tedros Adhanom Ghebreyesus thotë se ky studim i ri thekson rëndësinë e parandalimit dhe menaxhimit të obezitetit nga fëmijëria deri në moshën madhore, përmes dietës, aktivitetit fizik dhe kujdesit adekuat.

Ai shtoi se do të duhej puna e qeverive dhe komuniteteve dhe në mënyrë të rëndësishme kërkon bashkëpunimin e sektorit privat, i cili, sipas tij, duhet të jetë përgjegjës për ndikimet shëndetësore të produkteve të tyre.

Rrjeti prej më shumë se 1500 studiuesish, në bashkëpunim me OBSH-në, analizoi matjet e gjatësisë dhe peshës nga rreth 220 milionë njerëz të moshës pesë vjeç e lart.

Ata përdorën masën të quajtur indeksi i masës trupore.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.