Vetëm pak ditë pas fitimit të titullit kampion në Angli, Mançester Siti ka marrë një lajm të hidhur. Nuk është ende një lajm zyrtar, por që i ka bërë të dridhen të gjithë në klubin anglez. Mançester Siti, sipas prestigjiozes “New York Times”, mund të përjashtohet nga Champions League, kompeticioni më i lartë europian në rang klubesh. Arsyeja ka të bëjë me disa parregullsi të konstatuara në kuadrin financiar, që i takojnë vitit 2014.
Një lajm që ka rënë si bombë te kampionët e Anglisë. Gjithë ajo lumturi për fitimin e garës së titullit me Liverpulit mund të pasohet nga një shije mjaft e hidhur për ekipin e trajnerit Pep Guardiola. “New York Times” ka ngritur alarmin për përjashtimin e Sitit nga Champions League e sezonit të ardhshëm, sepse janë konstatuar parregullsi financiare në bilancin e 5 viteve më parë, në 2014-ën.
Kontrolli financiar i UEFA-s ka bërë një mbledhje në Nion dy javë më parë, ku ka analizuar gjithçka sa i takon bilancit financiar të klubit anglez. Sipas të përditshmes amerikane, vendimi zyrtar i UEFA-s do të publikohet brenda kësaj jave. Do të ishte një goditje e fortë për Mançester Sitin, nëse mbetet jashtë kompeticionit prestigjioz të klubeve. Ka kohë që klubi anglez është vënë në “lupën” e UEFA-s, ashtu si dhe PSG-ja në Francë, pasi shpenzimet e këtyre dy klubeve të drejtuara nga sheikët, janë të jashtëzakonshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.