Kthehet në qendër të vëmendjes “fair-play”-i financiar në futboll dhe, siç ndodh shpesh, prozhektorët janë mbi PSG-në. Këtë herë është prestigjiozja amerikane “New York Times”, që sulmon direkt UEFA-n se e ka mbrojtur klubin francez nga parregullsitë dhe shkeljet që ka bërë. Sipas kësaj gazete, organizmi që drejton futbollin në Europë ka injoruar shkeljet e PSG-së në hetimin e hapur në vitin 2017, kur ky klubi dhunoi rregullat e “fair-play”-it financiar. “New York Times” zbulon fakte se UEFA nuk u impenjua aspak për të treguar se klubi francez, me pronar nga Katari, nuk respektoi rregullat.
“Dokumentet vërtetojnë se UEFA u dorëzua në këtë çështje pa luftuar fare”, - shpjegon “New York Times”, që rendit me detaje të gjitha etapat që çuan në zgjidhjen e problemit financiar të PSG-së pa sanksione nga UEFA. Pse ky qëndrim kaq dashamirës ndaj kampionëve të Francës? Për këtë çështje gazeta amerikane ka një shpjegim: lidhja e “qeverisë” së futbollit europian me transmetuesin “BEIN Media Group”, me seli në Katar, që ka garantuar të drejtat TV të UEFA-s dhe të ortakëve të tjerë. Pra, është çështje biznesi.
UEFA nuk është dakord me konstatimin e gazetës së njohur amerikane dhe ka reaguar. “UEFA arriti në konkluzionin se kishte argumente bindës që mbështesnin interpretimin që klubi francez paraqiti tek ne”. Ky ishte qëndrimi i UEFA-s pas artikullit të “New York Times”. Sipas drejtuesve të futbollit në Europë, nuk ka asgjë të parregullt në vendimin për të mbyllur çështjen e PSG-së. Me siguri polemikat nuk do të mbyllen këtu.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.