Seanca dëgjimore me përfaqësues të botës akademike për ndryshimet kushtetuese të propozuara nga opozita parlamentare dështoi. Në mbledhjen e përbashkët të Këshillit të Legjislacionit dhe Komisionit të Ligjeve, të zhvilluar online u paraqit vetëm pedagogia Argita Buna, si përfaqësuese e një universiteti privat.
Buna e vlerësoi nismën si pozitive, e që i hap rrugën një diskutimi të gjerë publik, por u shpreh skeptike në lidhje me miratimin e saj. Në lidhje me propozimin për ndryshimin e sistemit zgjedhor duke kaluar në sistemin proporcional rajonal, Buna nënvizoi se Kushtetuta nuk e njeh fjalën rajon.
Ajo u shpreh skeptike edhe në lidhje me propozimin për ndalimin e koalicioneve, ndërsa foli me rezerva edhe për pragun e propozuar prej 5 për qind, që siç tha, mund të jetë shumë i lartë.
Ndërkohë, deputeti Myslim Murrizi qortoi mungesën e përfaqësuesve të tjerë. Ai tha se të paktën pedagogët e universiteteve publike e kanë për detyrë që t’i përgjigjen Kuvendit me ekspertizën e tyre në të tilla raste.
“Do të doja që të ishin të pranishëm të gjithë universitetet e drejtësisë, të paktën pjesën publike. e kanë për detyrim publikisht përderisa janë universitete që mbahen nga taksat e qytetarëve… që të ishin të pranishëm në këtë takim. Edhe nga Akademia e Shkencave duhej të ishte dikush”, u shpreh ai.
Mbledhja u drejtua nga deputetja Vasilika Hysi. Hysi propozoi në fund që në mungesë të ekspertëve të tjerë në seancën dëgjimore, pedagogët të dorëzojnë me shkrim brenda ditës së premte mendimet e tyre mbi nismën në tërësi, apo pjesë të caktuara të saj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.