.png)
Nga Gazeta ‘Si’- NATO ka deklaruar se nuk ekziston asnjë dispozitë për pezullimin apo përjashtimin e shteteve anëtare nga aleanca ushtarake, pas raportimeve se SHBA mund të kërkojë pezullimin e Spanjës për shkak të qëndrimit të saj ndaj luftës me Iranin.
Sipas Reuters, një zyrtar amerikan ka bërë të ditur se një email i brendshëm i Pentagonit sugjeronte masa ndëshkuese ndaj aleatëve që, sipas Uashingtonit, nuk kanë mbështetur mjaftueshëm fushatën ushtarake.
Në të njëjtin komunikim përmendej edhe mundësia e rishikimit të qëndrimit amerikan ndaj sovranitetit të Mbretërisë së Bashkuar mbi Ishujt Falkland në Atlantikun Jugor, të cilët pretendohen edhe nga Argjentina.
Një zyrtar i NATO-s i tha BBC-së se traktati themelues i aleancës “nuk parashikon asnjë mekanizëm për pezullim apo përjashtim të anëtarëve”.
Edhe kryeministri i Spanjës, Pedro Sánchez, hodhi poshtë raportimet, duke theksuar: “Ne nuk veprojmë mbi bazën e emaileve, por mbi dokumente dhe qëndrime zyrtare të qeverisë së Shteteve të Bashkuara.”
Ai shtoi se Spanja mbështet bashkëpunimin e plotë me aleatët, por gjithmonë “brenda kuadrit të së drejtës ndërkombëtare”.
Ndërkohë, kryeministri britanik Keir Starmer ka deklaruar se përfshirja më e madhe në konflikt apo në bllokadën amerikane ndaj porteve iraniane nuk është në interesin e Britanisë. Megjithatë, Mbretëria e Bashkuar ka lejuar përdorimin e bazave të saj për sulme ndaj objektivave iraniane dhe avionë të RAF-it kanë marrë pjesë në operacione kundër dronëve iranianë.
SHBA ka kritikuar vazhdimisht aleatët e NATO-s për mungesë angazhimi më të madh, sidomos pas sulmeve ndaj Iranit dhe kufizimit të lëvizjes në Ngushticën e Hormuzit nga ana e Teheranit.
Spanja, nga ana e saj, ka refuzuar përdorimin e bazave ajrore në territorin e saj për operacione kundër Iranit, megjithëse SHBA ka dy baza ushtarake atje: Naval Station Rota dhe Morón Air Base.
Emaili i brendshëm i Pentagonit sugjeronte gjithashtu masa të tjera si rishikimi i mbështetjes diplomatike amerikane për territore evropiane jashtë kontinentit, përfshirë Ishujt Falkland, apo përjashtimi i vendeve “problematike” nga pozicione kyçe brenda aleancës.
Megjithatë, sipas të njëjtit burim, dokumenti nuk parashikon tërheqjen e SHBA nga NATO apo mbylljen e bazave ushtarake në Evropë.
Zëdhënësja e Pentagonit, Kingsley Wilson, reagoi duke thënë se pavarësisht gjithçkaje që SHBA ka bërë për aleatët e saj, “ata nuk kanë qenë aty për ne”, duke shtuar se administrata do të shqyrtojë opsione për të siguruar që aleatët të kontribuojnë më shumë në të ardhmen./ BBC
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje