.png)
Gazeta Si - Drejtësia italiane ka dënuar përfundimisht me 15 vite e 5 muaj burg, Moisi Habilajn, raportojnë mediat italiane.
Vendimi ndaj tij ka marrë formë përfundimtare, pasi Gjykata e Lartë ka rrëzuar kërkesën e avokatëve kundër vendimit të Gjykatës së Apelit, duke lënë në fuqi dënimin ekzistues.
Habilaj akuzohet për trafikim të lëndëve narkotike dhe grupit të strukturuar kriminal.
Ai u arrestua në vitin 2017 nga policia italiane së bashku me 11 persona të tjerë, të cilët kryenin transportin e drogës nga Shqipëria në Siçili.
LEXO EDHE:
- Ekskluzive/ Dosja e Prokurorisë. Diamantet, makina dhe skafi që lidhin Saimir Tahirin me Habilajt
- Rishfaqet Moisi Habilaj, si u miqësua me djalin e bosit të “Cosa Nostra”-s për trafikun e drogës
Pas më shumë se 3 vitesh në paraburgim në pritje të gjyqit, për 44-vjeçarin u caktua masa e sigurisë në “arrest shtëpie”.
Së bashku me Habilajn, përfunduan në pranga edhe 11 persona të tjerë. Arrestimi i tij shkaktoi “tërmet” politik në Shqipëri. Hetimi u zgjerua më tej dhe përfshiu edhe ish-ministrin e Brendshëm, Saimir Tahiri, i cili gjithashtu ndodhet në burg duke vuajtur dënimin.
Tahiri ishe kushëri me Habilajt dhe akuzohet se i ka favorizuar, ndonëe ai i ka mohuar akuzat.
Habilaj, i cili e kishte bazën e tij të trafikut mes Katanias, Lentinit dhe krahinës së Raguzës, nuk do të shkojë pas hekurave të paktën për momentin.
Që nga fillimi i janarit 2021, trafikanti shqiptar i drogës është ende në arrati dhe nuk dihet se ku ndodhet.
Në verën e vitit 2020, 44-vjeçari u transferua pa byzylyk elektronik, në shtëpinë e vëllait të tij, Gazmedit, në Celantino.
Pasi kishte përcjellë bashkëshorten e tij, e cila u kthye në Shqipëri, Habilaj nuk gjendej në shtëpi pas kontrollit të zakonshëm të policisë.
Dosja e prokurorisë së Katanias ndaj Moisi Habilajt, u bë shkak për nisjen e hetimeve në Shqipëri ndaj ministrit të Brendshëm, Saimir Tahiri.
Pas një procesi disa vjeçar, ai u dënua në shkurt të këtij viti me 3 vjet e 4 muaj burg për shpërdorim detyre.
Sipas gjykatës, ish-zyrtari u shpall fajtor pasi me veprime dhe mosveprime, kishte lejuar kanabizimin e vendit dhe kishte favorizuar grupin kriminal të kushërinjve të tij Artan e Moisi Habilaj, duke i lejuar përmes policisë që të kultivojnë drogë në Vlorë e ta trafikojnë atë drejt Italisë.
Prokuroria italiane e përgjoi Moisi Habilajn, duke folur me anëtarë të bandës së tij, teksa tregonte se i kishte blerë dhurata e bizhuteri familjarëve të Saimir Tahirit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
