.png)
Pas 10 vitesh dominim më në fund është thyer binomi Ronaldo-Mesi. Topi i Artë për vitin 2018 është fituar nga mesfushori kroat Luka Modriç. Pas triumfit si lojtari më i mirë i kampionatit botëror dhe lojtari i sezonit nga Uefa, kroati merr në palmaresin e tij një tjetër trofe shumë të rëndësishëm. Modriç bëhet kështu lojtari i parë kroat në histori që arrin të fitojë Topin e Artë.
Pas triumfit në fjalët e tij të para Modriç ka qenë shumë i emocionuar dhe ka thënë se ky moment ka qenë një ëndërr shumë e madhe për të. Ai falënderoi shokët e tij te Real Madrid dhe Kroacia për sezonin e shkëlqyer që bëri.
Jam i lumtur dhe shumë krenar. Së pari dua të falënderoj shokët e ekipit, trajnerët te Real Madrid dhe te Kroacia, të gjithë ata që kanë votuar për mua dhe familjen time që më ndihmon të jem ky që jam sot. Kur isha fëmijë ëndërroja të fitoja sa më shumë trofe. Por Ballon d’Or është më shumë se një ëndërr.”- u shpreh futbollisti kroat.
Modriç ka mposhtur konkurencën e ashpër të portugezit Kristiano Ronaldo dhe dy francezëve Antoni Grizman dhe Kilian Mbape. Ndërkohë Lionel Mesi është mjaftuar vetëm me pjesëmarrjen në “Top 5” të këtij edicioni të Topit të Artë.
Në futbollin e femrave, Topi i Artë u fitua nga Ada Hegerberg. Futbollistja norvegjeze bëri një sezon shumë të mirë me ekipin e saj Olimpik Lion dhe ekipin kombëtar të Norvegjisë.
Trajneri më i mirë shkoi për kampionin e botës, Didier Deshamps. Ndërkohë nuk është larguar pa një çmim edhe sulmuesi francez Kilian Mbape që ka fituar për herë të parë çmimin Kopa. Ky trofe individual u dha për herë të parë në histori dhe iu dha 19-vjeçarit francez si futbollisti më i mirë Under-21.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
