Kryeministri Edi Rama ka zhvilluar një takim me homologun e tij grek Kyriakos Mitsotakis gjatë qëndrimit në Lituani ku po mbahet Samiti dy ditor i NATO-s.
Mediat greke raportojnë se Mitsotakis nuk është tërhequr nga çështja Beleri dhe se ajo duhet zgjidhur menjëherë.
Sipas burimeve qeveritare greke, kryeministri theksoi nevojën për zgjidhjen e menjëhershme të çështjes, duke theksuar se në Shqipëri ka një pikëpyetje të madhe të shtetit të së drejtës.
Në fund të fundit, ky element është një nga kriteret e anëtarësimit të Shqipërisë në BE, tha Mitsotakis sipas mediave greke
Kandidati i koalicionit “Bashkë Fitojmë” për bashkinë e Himarës Fredi Beleri u arrestua më 12 maj në lokalin e tij pas denoncimit në prokurori nga një person, i cili kishte treguar se i ishin ofruar para në këmbim të votave. Po ashtu, Beleri sipas organit të akuzës, u premtonte se do t’i përfshinte në skema për përfitimin e shtetësisë greke dhe të pensionit nga shteti grek. Pavarësisht hetimeve të nisur ndaj tij, Fredi Beleri mori Bashkinë e Himarës me 19 vota më tepër, përballë kandidatit socialist Jorgo Goro. Aktualisht kjo bashki drejtohet nga kryetari i këshillit bashkiak, ndërsa Beleri ndodhet ende në masë arresti me burg.
Qeveria shqiptare është shprehur se cështja Beleri nuk është një cështje e saj, por e drejtësisë, ndaj dhe nuk i takon asaj që të marrë vendime në këtë rast
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.