Miqësorja e bamirësisë, që do të luhet më 10 janar në “Air Albania Stadium”, do të bëjë bashkë shumë ish-futbollistë të njohur të Shqipërisë, Italisë, Greqisë dhe Turqisë. Një ndeshje e organizuar nga Sindikata e Futbollistëve Profesionistë Shqiptarë dhe FSHF-ja për të mbledhur fonde për familjet e prekura nga tërmeti. Edhe pse është një ndeshje bamirësie, nuk u ka shpëtuar polemikave në vendin tonë për shkak të ish-lojtarëve të përzgjedhur për të luajtur me fanellën kuqezi.
Tashmë janë mësuar edhe listat e plota të ish-lojtarëve pjesëmarrës nga Shqipëria, Greqia, Italia dhe Turqia. Në listën e ish-kuqezinjve është shtuar Ervin Skela, por mungesat janë të mëdha, duke nisur nga ish-kapiteni Rudi Vata, i cili kritikoi ashpër organizatorët, ose më saktë kryetarin e sindikatës, Andi Lila, për listen. Të tjerë ish-lojtarë të njohur të Kombëtares që mungojnë janë Altin Haxhi, Bledar Kola, Fatmir Vata, Geri Çipi, Arjan Xhumba, Elvin Beqiri, Ansi Agolli etj.
Tek Italia, përveç Xambrotës dhe Perrotës, që diheshin që në fillim, bie në sy prania e ish-trajnerit të Kombëtares shqiptare, Xhani De Biazit, por edhe e ish-lojtarëve të mëdhenj si Damiano Tomazi, Luixhi Di Biaxho, Benito Karbone dhe disa të tjerë.
Edhe në listën e Greqisë ka emra të njohur, me në krye ish-mesfushorin e Interit, Jorgos Karagunis, por edhe ish-sulmuesin Theofanis Gekaq dhe disa të tjerë.
Te Turqia bëjnë pjesë disa ish-futbollistë që kanë bërë histori me Gallatasarajin, por edhe me kombëtaren turke, si portieri Ryshty Eçber, Bulent Korkmaz, Emre Ashik, Hamit Altintop, Umit Karan dhe Tunçai Sanli.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.