.png)
Nga Gazeta ‘SI’ - Ministri i Financave dhe Ekonomisë Ervin Mete, tregoi për mediat disa ndryshime të parashikuara për viti 2024 në sistemin fiskal dhe jo vetëm.
Mete tha se është hartuar udhëzimi i ri lidhur me taksimin e kalimit të pronësisë, ku është vendosur një rregull i ri, në bazë të të cilit çmimet e referencës do të amortizohen me 1% në vit në varësi të moshës së ndërtesës. Godinat më të vjetra do të kenë çmim reference më të ulët për shitje. Pra sa më e vjetër ndërtesa, aq më i ulët çmimi referencë.
Duke mbetur në të njëjtin sektor, ministri tha se do të ketë një rishikim dhe të çmimeve të referencës për bregdetin, me ndarje sipas zonave.
Ai njoftoi edhe hyrjen në fuqi të ndryshimeve të reja të tatimit mbi të ardhurat personale, ku janë përfshirë edhe profesionet e lira, duke e quajtur si ‘drejtësi në tatimin e të ardhurave’.
Në përgjigje të pyetjeve të gazetarëve, ministri Mete njoftoi se po shqyrtohet zgjatja e afatit të investimeve strategjike, që ka përfunduar më 31 dhjetor 2023.
Për sigurimin e detyrueshëm të banesave, ministri u shpreh se po diskutohet nëse primi që do të paguhet të jetë i unifikuar apo të ndahet sipas zonave më të rrezikuara dhe vlerës së banesave.
Për 2024-ën, qeveria pret rritje të ardhurash me 40 mld lekë, krahasuar me 2023-shin dhe rritje ekonomike të njëjtë. Mete u shpreh se borxhi publik do të ulet nën 60% të PBB-së gjatë këtij viti, paralelisht me inflacionin.
“Plani i Rritjes, Growth Plan, i prezantuar së fundmi nga Komisioni Europian, i cili pritet të shërbejë si shtysë për përshpejtimin e procesit të integrimit dhe reformave, do të shoqërohet me një paketë financiare, ku vendi ynë pritet të përfitojë deri në 1 miliardë Euro, në formën e granteve dhe kredive të buta, krahas mbështetjes që merr aktualisht nga programet IPA”, tregoi ministri i Financave.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
