Ministri i Shëndetësisë, Arben Vitia do të jetë me gjasë kandidati nga Lëvizja Vetëvendosje për kryetar të Prishtinës, në kuadër të zgjedhjeve lokale të 17 tetorit.
Sipas “Express” kjo është konfirmuar edhe nga Qendra e Vetëvendosjes në Prishtinë.
Egzon Azemi, sekretar i kësaj qendre, tha se zyrtarizimi do të bëhet, duke respektuar afatet e përcaktuara nga Komisioni Qendror i Zgjedhjeve.
“Sa i përket kandidatit për kryetar, ende nuk është zyrtarizuar nga organet e Lëvizjes që e kanë këtë kompetencë, mirëpo, kërkesë e vazhdueshme e qytetarëve është që të jetë një nga ministrat më të mirë të kësaj qeverie, e besoj se shumë shpejt do të jetë publike”, thotë Azemi për ATV.
Mes tjerash, Azemi ka thënë se Vetëvendosja në Prishtinë është gati për 17 tetorin, derisa shtoi se kohëve të fundit kanë punuar në listën për asamble komunale.
Ndërkohë, derisa Arben Vitia do t’i hyjë garës për të parin e Prishtinës, po raportohet se njëri nga emrat e mundshëm për ta zëvendësuar atë në postin e ministrit është Haxhi Avdyli nga Lista “Guxo”.
16 gushti është afati i fundit kur partitë politike duhet t’i zyrtarizojnë kandidatët e tyre për kryetarë komunash për zgjedhjet e 17 tetorit.
Deri më tani për kryetar të Prishtinës janë zyrtarizuar kandidatët Daut Haradinaj nga AAK-ja, Uran Ismaili nga PDK-ja dhe Përparim Rama nga LDK-ja.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.