Për herë të parë, pas shumë vitesh pritje në Prishtinë zbriti një ekip i përmasave botërore si Milani. Klubi italian luajti sonte në mbrëmje përballë kampionëve të Kosovës, Feronikeli në një sfidë miqësore. 2-0 mbaroi kjo përballje, por rezultati i saj ishte ai që kishte më pak rëndësi.
Tifozët kosovar që e kishin pritur prej vitesh një ekip të tillë të luante në kryeqytetin kosovar, por befasuan sonte, pasi në shkallët e “Fadil Vokrrit”, kishte një numër të vogël tifozësh. Sigurisht ai në Prishtinë nuk ishte Milani i madh i 7 championsve apo i lojtarëve si Maldini, Shevshenko, Kaka apo Pirlo dhe më të mirët që mund të argëtonin në fushë ishin Piatek, Suso, apo edhe Leao. Ndryshe nga sa ndodhte 10 vite më parë në “Qemal Stafa” kur Milani i madh me Pirlo, Ronaldinjo, Kaka dhe Bekam mbushte stadiumin, këtë herë panorama në Prishtinë ishte krejt ndryshe.
Ndeshja e trumbetuar shumë nga mediet në Kosovë, por edhe ato në Itali ishte zhgënjyese për panoramën që prodhoi stadiumi bosh, por niveli i lojës nuk ishte aq keq. Kampionia e Kosovës, Feronikeli u përball me dinjitet përballë milanezëve, të cilët pas shënuan me Suson dhe Borinin filluan të eksperimentojnë me mendjen te starti i kampionatin që vjen shpejt, vetëm pas dy javësh.
Përballja miqësore Feronikeli-Milan pati një entuziazëm më të madh para fillimit të saj dhe shkaku ishte një emër i vetëm. Paulo Maldini, tashmë në rolin e drejtorit sportiv të Milanit entuziazmoi tifozët në Prishtinë, të cilët duket se biletën e kripur 35 euro e kishin blerë vetëm për një autograf të tij, apo nëse do të kishin fat të shkrepnin edhe ndonjë foto.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.