A paralajmëroi Ilir Meta zgjedhje në vjeshtë?

Presidenti Ilir Meta doli para gazetarëve jo vetëm për të mbajtur fjalën dhënë javën e kaluar se do të vendoste një komunikim periodik javor me publikun, por edhe për të prodhuar lajmin se do të firmosë në rastin e parë që do të shohë se i jepet mundësia nga Kodi i ri Zgjedhor dhe Kushtetuta për të caktuar datën e re të zgjedhjeve të përgjithshme, pa u konsultuar me partitë politike.

“Në çdo rast si me konsensus, apo edhe në mënyrë të njëanshme (miratimi i Kodit Zgjedhor), që nuk do të ishte habi, si President do të bëj të qartë që në hapësirën kohore që Kodi do të më lejojë do të shpall ditën e ardhshme të zgjedhjeve të përgjithshme në Shqipëri dhe nuk do të bëj konsultime me asnjë forcë politike, sepse jam i sigurt që të gjithë në Shqipëri mezi presin një Parlament legjitim, ose sadopak më legjitim se Parlamenti aktual. Nëse Kodi nuk miratohet me konsensus, e them që janë zero shanse çeljesh negociatash të Shqipërisë me BE, jo deri në zgjedhjet që vijnë, por edhe pas zgjedhjeve që vijnë”, deklaroi Meta.

Presidenti tha se nuk uron që ndryshimet në Kod të miratohen pa konsensus dhe pikërisht nga ky konsensus do të varet edhe data se kur ai mund të caktojë zgjedhjet e reja të përgjithshme. Me përkufizimet aktuale të Kodit Zgjedhor dhe duke marrë parasysh faktin se palët kanë rënë dakord që periudhat zgjedhore të ngushtohen në 15 prill- 15 maj dhe 15 tetor- 15 nëntor periudha më e afërt që Meta mund të shpallë zgjedhjet e reja është pranvera e ardhshme, gjithmonë nëse nuk ndryshon neni 9 i Kodit.

Në pikën dy të këtij neni përcaktohet shprehimisht se “Presidenti i Republikës nxjerr dekretin për caktimin e datës së zgjedhjeve për Kuvendin jo më vonë se 9 muaj para mbarimit të mandatit të Kuvendit. Me vendim të Kuvendit, mbyllja e legjislaturës, ose shpërndarja e tij bëhen jo më shpejt se 45 ditë para datës së caktuar për zgjedhjet dhe jo më vonë se 30 ditë para kësaj date”.

Por kjo jo domosdoshmërisht shmang mundësinë e zgjedhjeve në tetor-nëntor, pasi një marrëveshje politike mund të anashkalonte këtë pjesë dhe të çonte edhe në zgjedhje të parakohshme, që mund të zhvillohen në periudhën e vjeshtës.

Pyetja që ngrihet është se çfarë nënkuptoi Presidenti Ilir Meta me shpallje date për zgjedhje të reja brenda kornizave që i lejon Kushtetuta dhe ligji i ri zgjedhor pa pyetur partitë? A nënkupton kjo se ai mund të dekretojë datën e zgjedhjeve në tetor-nëntor, për t’i rikthyer, siç thotë, sa më parë legjitimitetin e këtij Parlamenti?

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.