Pas asaj paraqitjeje të dobët në transfertën me Askolin, Ledian Memushaj ka rrëmbyer skenën të premten në mbrëmje. Mesfushori vlonjat i Kombëtares ishte protagonist në barazimin 1-1 të Peskarës ndaj Peruxhias, që e mban skuadrën e tij në zonën e “Play-off”-it. Gjërat mund të kishin shkuar më mirë, nëse Peskara do ta mbronte deri në fund golin spektakolar të Memushajt. Vlonjati goditi fort me të djathtën dhe me një “silurë” të vërtetë e dërgoi topin në trekëndëshin e majtë të portës kundërshtare. Një gol spektakolar, që ka sjellë ovacione në stadiumin e Peskarës.
Rezultati u barazua 20 minuta para fundit nga Peruxhia, e drejtuar nga trajneri Alesandro Nesta. Pas këtij barazimi, Peskara mban vendin e 5-të në kampionat, me 49 pikë. Skuadra e Memushajt qëndron në zonën e “play-off”-it, por, nëse do të kishte fituar, mund të afrohej 3 pikë me vendin e dytë, që të çon direkt në Serinë A. Një shans i humbur, megjithëse shpresat për rikthimin në elitën e futbollit italian mbeten. Seria B kryesohet aktualisht nga Breshia e mesfushorit tjetër të Kombëtares, Emanuele Ndoj, me 57 pikë.
Memushaj nuk shënonte që prej nëntorit të vitit 2016, ndërsa në 10 ditët e fundit ka shënuar 2 gola. Në pushimin e ndeshjes me Peruxhian, futbollisti shqiptar është shprehur me modesti: “Nuk është më i rëndësishëm goli im se rezultati i skuadrës në këtë ndeshje. Duhet të luftojmë fort për të fituar”. Goli i vlonjatit i vlejti Peskarës vetëm për një pikë, pasi Peruxhia barazoi në pjesën e dytë. Ledian Memushaj është një nga lojtarët më të spikatur në Serinë B dhe shpesh është dalluar për asistet që jep. Ai është ekzekutuesi i thuajse të gjitha goditjeve standarde te Peskara.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.