.png)
Gazeta Si – Ka rënë gongu për mbylljen e merkatos. Nuk ka pasur ndonjë goditje mbresëlënëse të minutës së fundit, por vetëm disa zhvillime interesante, ku përfshihen Milani, Interi dhe Barcelona.
Interi ka rezistuar ndaj sulmit të PSG-së për Shkriniar dhe është përpjekur me çdo kusht për të marrë edhe një mbrojtës tjetër qendre. Steven Zhang nuk do që të shtojë kostot, por drejtuesit e klubit duan ta bindin për të marrë Açerbin. Emri i ri është Zagadou, pa kontratë aktualisht.
Orët e fundit doli në skenë emri i Zhordi Albës, por spanjolli nuk do ta veshë fanellën e Interit. Marota e ka refuzuar propozimin për mbrojtësin e majtë. Mediat spanjolle shkruan se, nëse Alba do kalonte tek Interi, Barcelona do paguante 60% të pagës, por kjo pistë ka rënë poshtë. As lojtari nuk donte të largohej.
Te Barcelona ka bërë ‘pazar’ Milani, që pret të zyrtarizojë mbrojtësin e krahut Dest. Mund të jetë rastësi, por goditja e parë e RedBird, pronarëve të rinj amerikanë të Milanit, do të jetë një amerikan. Lojtari mund të vishet kuqezi me formulën e huazimit me të drejtë blerje. Dest ka luajtur te Barcelona dy sezone, por jo gjithmonë titullar.
Aster Vranck ndërkohë ka mbërritur në Itali për të nisur aventurën me Milanin. Belgu, i datëlindjes 2002, vjen pas akordit që kuqezinjtë kanë arritur me Volfsburgun për një huazim prej 1.5 milionë eurosh, me të drejtën e blerjes për 12 milionë euro.
Në kampionatet e tjera, ndër goditjet më të forta të minutave të fundit është ajo e Fofana te Çelsi. Londinezët janë gati edhe për shkëmbimin e Markos Alonsos me Aubamejang të Barcelonës.
Mario Baloteli ka kaluar te Sioni në Zvicër, kurse Piatek ka lënë Gjermaninë dhe ka kaluar te Salernitana në Itali.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
