.png)
Gazeta Si – Deri pak javë më parë ishte bërë shqetësim qëndrimi në stol i mbrojtësve të Kombëtares për arsye të ndryshme. Reparti difensiv është një nga pikat më të forta të kuqezinjve dhe mosaktivizimi i lojtarëve me klubet e tyre do të ishte problem i madh, por situata ka ndryshuar shpejt.
Fundjavën që shkoi, me përjashtim të Marash Kumbullës, të gjithë mbrojtësit titullarë të Kombëtares ishin në fushë nga minuta e parë. Në Itali, ku aktivizohen kryesisht mbrojtësit tanë, Gjimshiti, Ismajli dhe Hysaj luajtën nga një 90-minutësh të plotë.
Berat Gjimshiti ka rifituar pozitat e tij tek Atalanta, që të dielën u mund 1-2 nga Leçe. Adrian Ismajli ka lënë pas dëmtimin dhe është rikthyer titullar me Empolin e tij, që në fundjavë barazoi 1-1 në fushën e Fiorentinës.
Elseid Hysaj u aktivizua në krahun e majtë të mbrojtjes nga trajneri Sarri në fitoren 0-2 në transfertë me Salernitanën. Mbrojtësi shkodran e ka rritur ndjeshëm nivelin e tij gjatë këtyre javëve të fundit, ku ka marrë më shumë minuta. Marash Kumbulla qëndroi gjithë kohën në stol në ndeshjen e Romës me Veronën.
Në Spanjë, Ivan Balliu mbetet titullar i padiskutueshëm te Rajo Valekano. Fakti që mbrojtësit po luajnë titullarë aktualisht sigurisht që e kënaq edhe trajnerin e Kombëtares, Silvinjo, pasi po afron ndeshja e parë eliminatore me Poloninë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
