Më shumë se 76,000 migrantë lanë Turqinë dhe u drejtuan për në Greqi ndërsa policia ngriti barrikada me tela me gjemba në vendkalimet kufitare dhe sulmoi me gaz lotësjellës turmën.
Emigrantët, mes të cilëve kishte edhe nëna të reja me foshnje në krah, kanë kaluar nëpër lum në Kastanitë, në kufirin Greqi-Turqi, ndërsa të paktën 500 persona në shtatë anije kanë mbërritur në ishujt Lesbos, Samos dhe Chios në Greqi.
Greqia, e cila ndryshe nga Turqia është në BE, mbrohet nga forcat kufitare të BE-së. Forca kufitare e BE, Frontex, tha se është në “gatishmëri të lartë” dhe po ndihmon Greqinë dhe Bullgarinë për t’i mbajtur kufijtë e tyre të sigurtë. Sofja, e cila vendosi ushtrinë e saj për të patrulluar nëj një gjatësi prej 120 kilometrash kufiri, tha se deri tani nuk ka lejuar asnjë kalim të paligjshëm të kufirit.
Azilkërkuesit u ndaluan gjithashtu të zbarkonin në ishullin grek të Lesbos për orë të tëra nga banorët që u bërtisnin atyre që të ktheheshin në Turqi.
Emigrantët që kalojnë nga Pazarkule, në kufirin me Greqinë, u përleshën me policinë. Gaz lotësjellës u hodh mbi turmën me sirianë, iraninë, irakienë, pakistanezë dhe marokenë, ndërsa azilkërkuesit hodhën gurë dhe u përpoqën të prejnë telat me gjemba.
Frontex tha se kishte dislokuar oficerë të saj në ishujt grekë, 60 oficerë në Bullgari dhe një kontigjent të mëtejshëm në rajonin Evros në kufirin grek. “Kemi marrë një kërkesë nga Greqia për mbështetje shtesë. Tashmë kemi ndërmarrë hapa për të dërguar në Greqi pajisje teknike dhe oficerë shtesë”, tha Frontex.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
