Deri në fillim të muajit maj numri i qytetarëve shqiptarë që kanë marrë dozën e parë të vaksinës kineze, Coronavac ishte 280 mijë vetë.
Shifra del nga relacioni që shoqëron aktin normativ të Qeverisë për miratimin e kontratës së re me kompaninë turke “Keymen Ilaç Sanayi ve Ticaret A.S”.
“Për të vijuar me mbulimin me doza të dyta, për totalin e 280 000 personave që kanë marrë dozën e parë janë të nevojshme edhe doza të tjera shtesë”, thuhet në relacion.
Shqipëria lidhi kontratë me kompaninë turk më 23 mars për marrjen e menjëhershme të 500 mijë vaksinave, me mundësinë e marrjes së një tjetër sasie të ngjashme. Por, pas dërgesës prej 500 mijë dozash, sasia tjetër më e madhe me vaksina kineze është 60 mijë doza.
Në relacion thuhet se kushtet që kërkon kjo vaksinë janë të favorshme dhe mundësojnë menaxhimin e sasive të mëdha.
Në lidhje me çmimin që do të merret sasia e dytë nuk ka asnjë të dhënë, ndërkohë që në aktin normativ përcaktohet se kontrata e re me kompaninë turke do të jetë sërish sekret dhe nuk do të botohet në Fletoren Zyrtare.
Efektet financiare që rrjedhin nga marrëveshja do të përballohen nga Fondi Rezerve i buxhetit të shtetit për vitin 2021.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
