'Masat janë të përkohshme dhe të padrejta'/ Kurti: Jam në kontakt të përditshëm me BE-në

Kryeministri i Kosovës Albin Kurti sërish i ka quajtur të padrejta masat e paralajmëruara nga Bashkimi Evropian ndaj Kosovës.

Nga Podujeva, ai ka thënë se disa masa edhe kanë filluar të zbatohen, duke përmendur anulimin e vizitave.

Kurti deklaroi se janë paralajmëruar edhe sanksione të tjera nga Bashkimi Evropian. Sipas tij aktualisht Kosova i ka të ngujuara miliona kredi dhe grante, që duhet të kalojnë nëpërmjet Kuvendit.

Ai deklaroi të hënën, tre korrik, se rreth 149 milionë euro janë të bllokuara.

“Është e vërtetë që janë paralajmëruar masa edhe janë zbatuar disa prej tyre, ju e dini që ushtrimi i madh ‘Defender Europe’, sidomos në Gjakovë, ku e kishim të planifikuar, u pat anulua, bëhet fjalë edhe për vizita e masa të përkohshme, të cilat për bindjen time janë të padrejta.

Ajo që ne duhet të bëjmë është që në Kuvend, me 2/3 e deputetëve, t’i kalojmë ato kredi dhe grante që kanë ngelur të ngujuara dhe s’po mund t’i gëzojnë ekonomia e Kosova, rreth 149 milionë euro. Kredi dhe grante që pa 2/3 nuk po kalojnë. Teksa mërzitemi për masat e ardhshme të përkohshme, ne kemi një ngujim aktual, të cilin do të mundë ta largojmë bashkërisht në Kuvendin e Kosovës”, tha Kurti.

Ai ka sqaruar se janë identifikuar 45 persona që bëjnë pjesë në dy organizatat e shpallura terroriste nga Qeveria javën e kaluar, “Mbrojtja Civile” dhe “Brigada e Veriut”.

“Deri më sot janë identifikuar 45 persona, identifikim i saktë që kanë marrë pjesë në sulm dhune ndaj ushtarëve të KFOR-it, policisë e gazetarëve, por edhe që kanë përdorur armë, ju e patë çfarë armatimi u konfiskua më 23 qershor. Qytetarë serbë janë më të frikësuarit prej këtyre kriminalëve, që na dërgojnë informacion çdoherë kur vepron ligji. Kemi pa numër fakte e dëshmi se bëhet fjalë për organizata terroriste, nëse nuk do t’i shpallini do të bënim shkelje dhe dëm”, u shpreh Kurti.

“Me BE-në jam në kontakt të përditshëm, dje kam biseduar me Borrellin, edhe me ndërmjetësin Lajçak, jam interesuar edhe për deskalim, edhe për normalizim, që nënkupton sundim të ligjit”, deklaroi Kurti.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.