Nga Gazeta Si- Në prag të Asamblesë Zgjedhore të Federatës Shqiptare të Atletikës, ku përballë Taulant Stërmasit ka dalë ish-kampioni i Europës Izmir Smajlaj, ka reaguar hapur edhe Luiza Gega. Në një reagim të gjatë, Gega thotë se “ato që u dënuan nga Federata Botërore për manipulim ende vazhdojnë të njollosin çdo pikë drejtësie me manipulimin e tyre të ndyrë”.
Gega sjell në vëmendje se si para dy vitesh, Federata Shqiptare e Atletikës u dënua për manipulim për 5 vite nga çdo aktivitet sportiv dhe madje nuk u lejohej as të afroheshin tek stadiumet si dhe u dënuan ish presidenti dhe njëkohësisht trajneri i Izmir Smajlaj, Gjergj Ruli, sekretari Nikolin Dionisi dhe sportisti Izmir Smajlaj për manipulim rezultati të një aktiviteti që u zhvillua në Tiranë, si shumë e shumë rezultate të tjera që ka manipuluar ndër vite sipas Gegës.
“Sportisti Izmir Smajlaj e fitoi gjyqin me pretendimin që nuk ishte në dijeni për manipulimet që bëheshin (ku për fat të keq ne të gjithë e dinim, sigurisht edhe Izmiri). Më dhemb kjo pjesë sepse kam investuar gjithë jetën time për të bërë diçka të mirë për vendin tim dhe mënyra se si duan ta shkatërrojnë është e frikshme. Kjo është dhe arsyeja pse të gjitha normat olimpike rekordet i kam në pistat më të mëdha botërore që të mos isha kurrë pjesë e këtyre lojërave të ndyra”, shkruan Gega, duke shtuar se Federata Botërore e Atletikës dënoi përveç individëve edhe federatën ku për një kohë të pa caktuar nuk do t’i njihte asnjë rezultat që bëhej në Shqipëri në qoftë se nuk do të plotësonin të gjitha kriteret e një loje të pastër dhe të ndershme.
Gega tregon se nuk ka folur kurrë për këtë ngjarje, pasi sipas saj, nuk donte të dukej si një sulm ndaj Izmirit edhe pse “këto skandale kurrë nuk duhet lejuar të kalojnë në heshtje”.
Pas ngjarjes, Gega tregon se ishte ajo që iu lut Stërmasit që të merrte në dorë federatën dhe pasi u zhvillua një asamble e jashtëzakonshme, ku edhe pse, sipas Gegës iu bë presion klubeve që të mos e votonin, përsëri arriti të fitojë.
Gjithsesi, Gega thotë se gjatë këtyre më pak se dy viteve u morën vesh shumë gjëra se çfarë kishte ndodhur në gjithë këto vite me federatën.
“Edhe pse Taulant Stërmasi fitoi me shumicë votash, Gjykata nuk e njohu si President sepse që në vitin 2010 presidenti i mëparshëm nuk kishte dërguar asnjë asamble në Gjykatë dhe për këtë arsye nuk njihej asnjë veprim. Që zgjedhjet të jenë të vlefshme duhet të shkojmë në vitin 2010 dhe të votojnë ato anëtare që kanë marr pjesë në këtë asamble. Pra për më shume se 14 vite federata ka qenë totalisht e paligjshme vetëm që presidenti të kishte mandat të përjetshëm sepse statuti i njeh vetëm 2 mandate dhe me dy mandate ai nuk e mbante dot ndryshe përjetë federatën”, shkruan Gega, duke shtuar se gjërat e ndyra nuk marrin fund me kaq.
Duhet të bëhen zgjedhjet e reja dhe shpallen kandidaturat për president dhe ishte Izmir Smajlaj dhe Taulant Stermasi.
“Deri në këtë moment nuk ka asgjë të keqe sepse çdokush ka të drejtë të kandidojë edhe pse unë kam rezervat e mia duke qenë që të marrësh përsipër një federatë duhet të dish diçka më tepër se sa thjesht të vraposh apo të kërcesh”.
Mbrëmë, shkruan Gega, grupi i punës së ish-federatës së dënuar “(sigurisht me në krye ish presidentin por thjesht këtij nuk i lejohet t’i figurojë emri në letër) dërgon email që Taulant Stërmasi përjashtohet nga Kandidimi sepse e kanë propozuar vetëm klubet dhe ne kemi vendosur të njihen vetëm shoqatat pasi ligji i 2020 pranon vetëm klubet që janë kthyer në shoqata edhe pse në këtë rast ne kemi shkuar në vitin 2010 për faj të kësaj federate”.
“Ky grupi punës ka pranuar disa shoqata që s’kanë qenë kurrë anëtarë, s’kanë marrë pjesë kurrë në asnjë aktivitet që ka zhvilluar federata. Për më tepër gjykata e përcakton se kë anëtar njeh në këto zgjedhje dhe citon te gjitha klubet. Kjo bëhet si e si të merret fitorja në tavolinë. Në të gjithë kishim dijeni për shumë gjëra që do të ndodhnin, presionet që ju bëhen klubeve dhe nga ombrella më e lartë e sportit sepse për fat të keq Shqipëria jonë është shumë e vogël dhe çdo gjë dihet si ndodh, kur ndodh, nga kush ndodh. Vazhdojnë me pafytyrësinë më të madhe të mundohen në të gjitha format mos të lënë asnjë njeri që e do këtë vend të punojë dhe të bëj diçka të mirë”, shkruan Gega.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
