Kosova

Lugina e Preshevës kërkon të përjashtohet nga vendimi për targat

Përfaqësuesit e shqiptarëve në komunat Preshevë, Medvegjë dhe Bujanoc kanë kërkuar nga Qeveria e Kosovës që këto komuna të përjashtohen nga vendimi për reciprocitetin e targave të automjeteve.

Kryetari i Këshillit Kombëtar të Shqiptarëve, Ragmi Mustafi, tha se kërkesa është bërë për shkak të problemeve në qarkullim të banorëve të këtyre komunave të shkaktuara nga vendimi për reciprocitetin e targave.

Ai tha se i ka kërkuar qeverisë së Kosovës që të mundësohet liria e lëvizjes për të gjithë qytetarët.

"Ne dërguam një kërkesë për përjashtimin e komunave të Bujanocit, Preshevës dhe Medvegjës nga vendimi. Nuk bëhet fjalë veçmas për shqiptarët apo serbët por për ato tri komuna që janë shumë të lidhura me Kosovën, nga të cilat njerëzit udhëtojnë çdo ditë", tha Mustafi.

Megjithatë për përfaqësuesit shqiptar të Luginës së Preshevës, vendimi i Qeverisë së Kosovës, sipas Mustafit është politikisht i kuptueshëm por zbatimi i tij është i diskutueshëm sepse i shndërron shqiptarët nga Lugina e Preshevës në pengje të Prishtinës dhe Beogradit.

"Ne mbështesim çdo vendim të Prishtinës që forcon shtetin e Kosovës, por kjo lëvizje po na mban peng. Ajo ka goditur më shumë shqiptarët nga Lugina e Preshevës, të cilët kanë lidhje familjare dhe historike me Kosovën", tha ai.

Pas vendimit të Qeverisë së Kosovës për reciprocitet me Serbinë, shoferët me targa të Serbisë kur hyjnë të Kosovë duhet të marrin targa të përkohshme, njësoj siç obligohen qytetarët e Kosovës me targa RKS  t’i ndërrojnë ose t’i mbulojnë targat kur futen në Serbi.

Vendimi i autoriteteve të Kosovës për të zbatuar masa reciprociteti ndaj automjeteve me targa të Serbisë, që hyjnë në Kosovë, ka nxitur protesta të banorëve serbë në veri të Kosovës dhe reagime të ashpra të Beogradit zyrtar.

Përfaqësues të Serbisë thonë se Kosova, me këtë veprim, ka shkelur dispozita të Marrëveshjes së Brukselit, të cilën dy vendet e kanë arritur me ndërmjetësimin e Bashkimit Europian.


Copyright © Gazeta “Si”


Më Shumë