Një “betejë” e vërtetë në stadiumin “Fenway Park” të Bostonit mes Liverpulit dhe Seviljes, edhe pse ishte vetëm një miqësore. Anglezët kanë akuzuar spanjollët për sjellje të dhunshme në fushë në këtë miqësore vere. Lojtari i Liverpulit, Jaser Larouci, la fushën me barelë dhe përfundoi me paterica për shkak të një ndërhyrjeje brutale të kundërshtarit.
Trajneri Jurgen Klop po fillon ta mallkojë turneun amerikan. Liverpuli i tij humbi miqësoren e parë me Borusia Dortmund dhe trajneri gjerman shpresonte për një ndeshje më të mirë ndaj Seviljes, por u mund sërish, këtë herë 2-1 dhe me polemika. Drejtuesve dhe lojtarëve të Liverpulit nuk u ka pëlqyer aspak loja e ashpër e spanjollëve, të cilët e mbyllën ndeshjen me 10 vetë. Joris Gnagnon u ndëshkua me karton të kuq për një ndërhyrje prej “killeri” ndaj të riut Jaser Larouci. Kjo mënyrë loje u quajt e turpshme nga Liverpuli, sepse një nga talentet më premtues të kësaj skuadre, u largua nga stadiumi me paterica. Episodi i shëmtuar ndodhi në minutën e 76-të, kur rezultati ishte 1-1. Larouci la fushën, pasi u godit dhunshëm pa top nga francezi Gnagnon, por nuk ishte i vetmi incident i ndeshjes. Herri Uillson u godit me bërryl në fytyrë nga Ever Banega.
“Të kuqtë” reaguan pas ndeshjes, siç bën me dije “Telegraph”. Xhejms Milner sulmoi direkt ekipin spanjoll: “Ishin disa ndërhyrje të ashpra dhe të pandershme. Ishte thjesht një miqësore dhe në të tilla ndeshje nuk ka kartonë të kuq. Nëse do të bësh një faull, tërhiqe kundërshtarin nga fanella, jo ta godasësh atë direkt në gju. Është e turpshme t’i shohësh ato pamje”. Edhe Virxhil Van Dijk foli për këtë episod, duke inkurajuar shokun e skuadrës: “Nuk duhet t’ua bësh këtë gjë kundërshtarëve para nisjes së sezonit. Shpresoj që Larouci të mos jetë dëmtuar aq keq”, - tha holandezi.
Klop foli me kolegun Lopetegui gjatë ndeshje që Sevilja e fitoi 2-1. Pas ndeshjes trajneri i Liverpulit u tregua diplomat në konferencën për shtyp: “Është shpejt për të folur. Duket se djaloshi ka qenë me fat, por duhet të presim pak. Nuk kam folur ende me doktorin. Lojtari ynë nuk mund të luante më, kurse në dhomat e zhveshjes u duk gjithçka në rregull. E njëjta situatë edhe për Uillsonin, i cili u godit me bërryl nga Banega”.
Pas ndeshjes, Gnagnon kërkoi falje publikisht me një mesazh të postuar në Tuiter: “Kërkoj falje për atë gjest të dënueshëm nga ana ime. Një veprim i pajustifikueshëm, që nuk duhet parë më në fushat e futbollit, për asnjë arsye. Lutjet e mia janë për lojtarin e Liverpulit dhe për familjen e tij”, - ka shkruar francezi. Edhe klubi i Seviljes ka kërkuar ndjesë në faqen e saj zyrtare në rrjetet sociale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.