.png)
Nga Gazeta ‘Si’– Presidenti i SHBA-së thotë se energjia e erës është “për njerëz budallenj”. Disa në Europë bien dakord.
Fushatat në rrjetet sociale që pretendojnë se energjia e erës shkakton kancer dhe helmon ujin e pijshëm po shtohen në të gjithë Europën, duke përhapur një mosbesim ndaj energjive të rinovueshme në stilin amerikan në një kontinent që tradicionalisht ka qenë pro energjisë së pastër.
Suedia dhe vendet nordike në veçanti janë kthyer në qendra të dezinformimit kundër energjisë së erës, sipas një raporti të ri të porositur nga lobimi europian i energjisë së erës.
Raporti paralajmëron se pretendimet e rreme për energjitë e rinovueshme po ngadalësojnë projektet që BE-ja i konsideron thelbësore për sigurinë energjetike.
“Nëse keqinformimi dhe dezinformimi pengojnë këtë proces, atëherë kemi një problem serioz,” tha zëdhënësi i WindEurope, Christoph Zipf, për POLITICO.
“Nuk bëhet fjalë vetëm për industrinë e erës. Bëhet fjalë për të siguruar energji që nuk varet nga Ngushtica e Hormuzit, por prodhohet këtu në Europë.”
Sipas raportit, një rrjet aktivistësh, politikanësh, mediash periferike dhe komunitetesh online po përhap pretendime se turbinat e erës shkaktojnë ndërprerje energjie, dëmtojnë jetën e egër, shkaktojnë kancer dhe ndotin ujin e pijshëm.
Këto pretendime janë shpërndarë nga më shumë se 500 llogari në gjashtë platforma sociale, duke prodhuar dhjetëra mijëra postime kundër energjisë së erës gjatë dy viteve të fundit.
Llogaritë suedeze krijuan numrin më të madh të postimeve kundër energjisë së erës, të ndjekura nga Franca, Norvegjia, Finlanda, Mbretëria e Bashkuar dhe Gjermania. Studiuesit theksuan se renditja ndikohet pjesërisht nga kufizimet në mbledhjen e të dhënave, por vendet nordike dolën qartë si një qendër kryesore e aktivitetit anti-erë.
Këto gjetje vijnë në një moment kritik për Europën. Ndërsa lufta në Iran po nxjerr në pah cenueshmërinë europiane ndaj krizave të karburanteve fosile dhe ndërprerjeve të furnizimit, BE-ja po shtyn më fort se kurrë elektrifikimin dhe energjitë e rinovueshme për të ulur varësinë nga importet e karburanteve fosile.
Raporti vjen gjithashtu në një kohë kur presidenti amerikan Donald Trump po ashpërson luftën e tij kundër energjisë së erës.
Ai i ka quajtur turbinat “mullinj të mëdhenj të shëmtuar”, “mashtrimi i shekullit” dhe një burim energjie “për njerëz budallenj”. Administrata e tij po bllokon projekte të reja dhe po shpenzon miliarda dollarë fonde federale për të anuluar projekte tashmë në zhvillim.
Fushata të targetuara
Raporti argumenton se narrativat online po shndërrohen gjithnjë e më shumë në pengesa reale për projektet energjetike.
“Një nga aspektet më interesante ishte dezinformimi që synon jo vetëm kompanitë, por projekte specifike,” tha Carl Miller, themelues i CASM, për POLITICO. “Ajo që është interesante është sa të lokalizuara janë këto narrativa. Në disa vende flasin për koston ekonomike, në të tjera për ndikimin ekologjik, e në disa të tjera për elitat.”
Në Suedi, Finlandë dhe Mbretërinë e Bashkuar, narrativat kundër energjisë së erës mbi çmimet e energjisë, paqëndrueshmërinë e rrjetit dhe blackout-et morën shumë vëmendje. Në Norvegji dhe Itali dominuan pretendimet për shkatërrimin e mjedisit.
Studiuesit thonë se këto fushata po funksionojnë si një lloj “sistemi paralel lejesh”, duke krijuar opozitë lokale që mund të çojë në ankesa, vonesa dhe presion politik kundër projekteve.
Kjo është veçanërisht e rëndësishme në vende si Suedia dhe Norvegjia, ku bashkitë kanë fuqinë të bllokojnë projektet e energjisë së erës.
Brukseli po përpiqet të përshpejtojë miratimet përmes paketës së rrjeteve energjetike, e cila synon modernizimin dhe zgjerimin e rrjeteve elektrike europiane, shkurtimin e afateve të lejeve dhe lehtësimin e lidhjes së kapaciteteve të reja të energjisë së erës dhe diellit me sistemin energjetik.
Studimi përshkruan gjithashtu mënyrën se si narrativat përhapen përtej kufijve online, përfshirë mesazhe të stilit MAGA kundër “elitave ekonomike” dhe agjendave globaliste, të ripërdorura në debatet europiane për energjinë.
“Interneti ka krijuar një përzierje shumë të çrregullt kulturash politike,” tha Miller. “Ato jetojnë në të njëjtat hapësira online dhe flasin për të njëjtat tema.”
Raporti nuk fajëson drejtpërdrejt aktorë të huaj si Rusia apo SHBA-ja, por studiuesit vunë në dukje se narrativat kundër energjive të rinovueshme shpesh mbivendosen me retorikë kundër vaksinave, kundër BE-së dhe mesazhe të së djathtës ekstreme.
“Rusia e përdor varësinë energjetike si mjet gjeopolitik,” tha Miller. “Është eksportues i madh i karburanteve fosile dhe energjisë bërthamore. Nuk dëshiron të shohë një Europë energjetikisht të pavarur që forcon kapacitetet e saj në energjitë e rinovueshme.”
WindEurope thotë se ndikimi tashmë po ndihet në terren. Raporti dokumenton raste projektesh të vonuara ose të anuluara me vlerë miliarda euro, si dhe rritje të fushatave të rezistencës dhe apelimeve ligjore.
“Keqinformimi dhe dezinformimi sjellin vonesa, sepse shohim rezistencë dhe ankesa kundër projekteve të energjisë së erës,” tha Zipf.
Nikola Gazdov, drejtor i kompanisë bullgare të energjisë së rinovueshme Element Poëer, e përshkroi Bullgarinë si një paralajmërim se si dezinformimi mund të shndërrohet në paralizë politike: “Bullgaria nuk ka ndërtuar asnjë park të ri me erë në dymbëdhjetë vitet e fundit.”
Studiuesit paralajmërojnë se beteja e ardhshme mund të zhvillohet brenda sistemeve të inteligjencës artificiale. Në një studim paraprak, CASM zbuloi se faqet anti-erë citoheshin shpesh nga modelet e mëdha gjuhësore kur u përgjigjeshin pyetjeve për energjinë e erës.
“Mendoj se kjo është fronti i ri,” tha Miller. “Ndërsa kalojmë në një botë ku informacioni interpretohet dhe filtrohet gjithnjë e më shumë nga modelet e inteligjencës artificiale, është e pashmangshme që edhe lufta informative të ndryshojë.”/ Politico
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje