.png)
Nga Gazeta ‘Si’- Çmimet globale të ushqimeve pritet të rriten me 11.8% gjatë vitit 2026, ndërsa rritja parashikohet të vijojë edhe në 2027, me rreth 4.8%, sipas një analize të Oxford Economics.
Goditja më e madhe pritet të ndihet te drithërat, frutat, perimet dhe produktet e bulmetit, ndërsa gruri konsiderohet një nga produktet më të ekspozuara ndaj rritjes së çmimeve.
Kjo mund të sjellë shtrenjtim të produkteve që varen nga gruri, si buka, makaronat, biskotat dhe drithërat e mëngjesit.
Rritja e çmimeve vjen në një kohë kur Europa po përballet me temperatura ekstreme dhe thatësira, të cilat kanë dëmtuar të korrat.
Në të njëjtën kohë, fermerët po përballen me kosto më të larta të energjisë dhe plehrave kimike, ndërsa luftërat në Ukrainë dhe Lindjen e Mesme po shtojnë presionin mbi tregjet e lëndëve të para.
Sipas Oxford Economics, një nga faktorët kryesorë është rritja e kostove të inputeve bujqësore, veçanërisht naftës, gazit natyror dhe plehrave. Çmimet globale të dizelit u rritën me 36% në korrik krahasuar me një vit më parë, ndërsa çmimet e plehrave pritet të rriten me 22% gjatë 2026.
Lufta në Ukrainë mbetet gjithashtu një faktor i rëndësishëm. Rusia dhe Ukraina së bashku përbëjnë pak më pak se 30% të eksporteve globale të grurit dhe mbi 10% të eksporteve të misrit.
Sulmet ndaj porteve dhe ndërprerjet e eksporteve përmes Detit të Zi mund të prekin rreth 86 milionë tonë kapacitet eksportues drithërash në vit, ose gati 17% të eksporteve globale.
Në Europë, dëmet nga temperaturat e larta kanë detyruar edhe rishikimin në ulje të parashikimeve për prodhimin e drithërave. Coceral, shoqata europiane e tregtisë së drithërave dhe farërave vajore, uli në korrik parashikimin për prodhimin e kombinuar të BE-së dhe Mbretërisë së Bashkuar nga 295.5 milionë tonë në 286.6 milionë tonë. Një vit më parë, prodhimi ishte rreth 310 milionë tonë.
Në Gjermani, prodhimi i drithërave pritet të bjerë me 7% këtë vit, në rreth 41.9 milionë tonë, për shkak të thatësirës dhe valëve të të nxehtit.
Sipas ekspertëve të Oxford Economics, çmimet e frutave dhe perimeve të freskëta mund të fillojnë të reflektojnë këto goditje brenda dy deri në tre muajve, ndërsa ndikimi te ushqimet e përpunuara pritet të jetë më i vonuar. Kulmi i rritjes së çmimeve për këto produkte parashikohet të ndihet rreth shkurtit-majit 2027.
Megjithatë, rritja e parashikuar për 2026 mbetet nën nivelin e vitit 2022, kur çmimet globale të ushqimeve u rritën me 14.2%/ Euronews
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje